ORANJESTAD (AAN) – Historia di Dia di Mama Tera: E idea di Dia di Mama Tera tabata iniciativa di senador di Merca pa Wisconsin, Sr. Gaylord Nelson, cu na 1970 despues di tabata testigo di un oil spil grandi na California,
como tambe inspira pa e movemento anti-guera, a realiza cu su persona hunto cu conscientisacion publico di efectonan di polucion di aire, awa y tera lo por yuda pone e tema di proteccion di medio ambiente riba e agenda politico. Asina DNM ta splica den su relato, relaciona cu e tema.
E prome Earth Day a yuda na introduccion di United States Environmental Protection Agency (US EPA) y a logra di tin leynan pa aire y awa limpi, como tambe bestianan protegi. E organisacion Earthday.org ta e organisacion mundial mas grandi pa loke ta trata movemento pa nos medio ambiente. E mision di e organisacion aki ta pa diversifica, educa y activa hendenan rond mundo pa vocifera mas pa medio ambiente.
E tema pa e aña aki ta pa inverti den nos planeta. Esaki kiermen pa tuma accion, inverti bo tempo y participa den bo comunidad. Un di e accionnan mas simpel ta pa haci un clean-up den bo bario, beach of cura di cas.
E iniciativa di Earthday.org ta inclui e GreatGlobal Clean-up, na unda gruponan por registra nan evento di haci un area limpi. Esaki ta un actividad di y pa comunidad cu ta beneficia e medio ambiente. E impacto positivo aki no lo beneficia solamente bo bario of pais pero full planeta Tera. Door di participa den actividadnan aki hende ta bira mas conciente di nan mes habito y relacion cu desperdicio. Nan meta ta pa un observacion civico mas grandi na mundo, cu participacion di mas cu 1 biyon di hende den 192 pais tur aña.
E otro accion ta the Canopy Project cu ta encera plantamento di mata rond mundo. Desde 2010 Earthday.org a logra activa hende y a logra planta 10 miyon di mata rond mundo. Cu e initiativa aki kier logra reforesta e areanan cu tin necesidad di rehabilitacion y otro na unda e comunidadnan cu ta na riesgo pa motibo di cambio di clima. Na Aruba tambe nos tin organizacion manera Ban Lanta y Planta cu tin necesidad di boluntarionan, fondonan y ta en busca di posibel areanan pa planta mata na unda esakinan por keda protegi y ta haya awa.
DNM ta desea wak e comunidad di Aruba mas activo riba dia di Mama Tera teniendo nos Aruba limpi door di sa kico ta pa cada un di nos, e impacto door di edesperdicio cu nos ta genera. Planta un mata nativo den bo cura, cuid’e y dun’e awa pa asina mañan e generacion nobo por disfruta di esaki, asina ta lag’e como un herencia pa esnan cu ta bini.
