Santa Rosa a keda satisfecho cu asistencia na reunion di tur seis isla encuanto Agricultura y Cria  

ORANJESTAD (AAN): Recientemente e directora di Santa Rosa, esta Nathalie Maduro a viaha pa Curaçao unda cu esnan di Aruba a sinta na mesa cu representantenan di e otro islanan. 

Di e forma ey, tur seis isla a cuminza traha cu otro pa mira con por uni forza y yuda empuha agricultura, cria, y pesca den un nivel nobo cu por yuda e islanan aki bira mas sostenible, y menos dependiente di importacion.

   Nathalie Maduro di Santa Rosa a bisa cu e temanan cu a wordo discuti , y e proposito inicial di e conferencia cu tabatin e nomber di ‘Dutch Caribbean Visioning Process” tabata pa mira kico ta e potencial di cada isla, kico ta e limitacionnan, y mira con hunto por bin cu solucionnan.

   “E no ta djis pa establece seguridad di cuminda, pero tambe check posibilidad pa bay contribui na parti economico di cada isla,” Maduro a indica.

   Den e reunion aki por a bin realiza, con e union diferente LVV di e isla, di e representante y dignatarionan ta sobresali.  Di Aruba a viaha tambe Ministro Ursell Arends, como tambe Sra. Regales cu ta nan consehero legal, y tambe Gerry Croes kende ta representante di Ministro di Economia.

   Ta conoci cu pa Gobierno, un di e sectornan prometedor ta agricultura!  Ainda kizas Aruba no ta na e nivel cu e isla ta desea pa bay ta, pero tur hende por mira awor den prensa cuanto actividad tin awendia.  Pues bo ta mira cu poco-poco e cunukeronan cu antes no tabata asina activo, awor si ta produciendo bek, y a bin acerca un monton di cunukero nobo.  Nan a uni na e esfuerzo di planta pa asina e isla tin mas produccion local.

   Na comienzo a trata na identifica loke ta e limitacionnan, y loke ta e potencial di cada isla.  Por ehemplo na Aruba, e isla aki no ta haya hopi yobida, y a core busca solucion pa situacion di awa.  Pero na e islanan ariba unda tur hende tin e percepcion cu aya awa ta yobe hopi.... a bin constata cu nan no ta colecta awa di yobida, pues pa nan tambe awa ta un limitacion.  E ora Aruba a cuminza comparti su pasonan cu a wordo tuma pa bin cu solucionnan pa e sector.

   E Agricultornan na Islanan Ariba tambe tin problema cu e.o. Baca cu Cabritonan, mientras cu na Aruba, debi na limitacion di tereno grandi, hopi biaha pa aspecto di esey, ohala cu e isla aki lo por tin asina mas hopi carni fresco.  Pues aki bo ta mira cu pa esnan di Isla Ariba den futuro, e por bira cu nan por cuminza produci carni y exporta kizas pa islanan ABC.

   Un di e limitacionnan cu a keda existi, ta e parti di transporte, pues con por haci intercambio di producto entre e islanan (sea avion of barco), y aki a discuti riba diferente posibilidad.  Aki ta unda cu e delegacion di Aruba ta contento cu Ministro Ursell Arends a participa den esaki.  El a participa tambe den e bishitanan na e cunucunan na Curaçao, y den diferente sesion, hunto cu dignatarionan di Saba y St. Eustatius.

   “Hopi biaha como Ministro, nan tin interes pa e cartera cu nan ta carga, pero kizas nan no tin full e conocemento,” Nathalie Maduro a bisa.  “Y esaki tabata un berdadero manera pa nan por a mira cu e limitacionnan na Curaçao ta hopi similar cu di Aruba.  Di otro banda con Aruba como isla cu kizas hopi ta pensa cu e sector primaria no ta hopi desaroya ainda, toch por nota cu algun area e isla aki a desaroya hopi mas rapido.  Na Curaçao ta produciendo hopi batata dushi.  Den caso di Aruba, por mira cu tin hopi cunukero unda ta keda cultiva pinda, pampuna, patia, pero via sistema hidroponics.

   Tur esaki a wordo discuti na forma habri y a brainstorm riba dje.

   E conferencia di tur LVV di e seis islanan a bay den bon direccion na Curaçao.  Segun Nathalie Maduro, unda a bin realiza cu tur isla tin e mesun deseo, y ya caba pa 2023 e decision a cay pa Aruba bira sede di e reunion aki na luna di Mei.

   Na Aruba e reunionnan lo bay sigui, pa asina mira kico a wordo logra di November 2022 te cu Mei 2023 na cada isla relaciona cu loke a wordo discuti na Curaçao, pero tambe lo bin cu cierto temanan unda e agricultor y criadornan por participa tambe den e Conferencia pa asina nan tambe wordo enriquece cu informacion.