Hopi importante pa nan desaroyo di curpa y cerebro:
ORANJESTAD (AAN) – Den entrevista cu señora Iraida Thijsen, Nutricionista di IBiSA, el a comenta cu den edad di scol basico por wak cu e muchanan ta participa den deporte, cu hopi entusiasmo, pero un bez cu nan yega edad di hoben (12-13 aña bay ariba), hopi biaha nan ta cay afo.
Por ehemplo, den e team di futbol por wak cu e teamnan ta bira mas chikito, y nan ta haya otro interes, por ta arte, musica of otro, locual ta bon, pero loke ta hopi importante ta pa nan keda move. IBiSA di e banda ey, ta haciendo algun actividad pa hoben caba, pa e chikitonan di scol basico, pero nan a cuminza cu actividad pa e hobennan di 13 pa 17 aña. Esaki ta gratis. Hasta vacancy camp lo bay organiza na December, pasobra IBiSA ta ripara cu interes pa deporte ta bira menos den e edad aki, y mester haci extra esfuerzo pa mantene nan aki.
Thijsen a agrega cu podise cu na scol e materianan ta bira mas pisa, of e mayornan ora e yiunan ta bira mas grandi, ta laga nan un tiki mas los. E ta kere cu mayor mester keda sostene e yiunan adolescente pa keda haci deporte, pasobra e ta keda algo pa bida largo. No solamente aworaki pa nan saca nan energia, pero pa bida largo pa nan salud, Iraida Thijsen a acentua.
El a comenta cu el a compronde for di un mayor cu tin dos yiu cu ta tuma hopi di dje pa hiba y busca nan den deporte, pero si e mayor no ta hacie y ta hopi importante no solamente pa e hoben su salud, sino pa su desaroyo social, y pa tur cos: ken ta bay hacie pe?
Segun Iraida Thijsen esaki ta un reto grandi pa loke ta computer, celular, etc., pero e mayor ta esun cu ta tuma decision y por bisa e yiu cu tanto tempo ta pa scol y estudio y tanto tempo ta pa deporte, pasobra ta hopi importante pa e yiu.
Si e yiu no kier bay baseball, futbol, of ballet, mayor tin cu bise cu e tin cu scoge otro deporte of movecion, pasobra e ta hopi importante pa e mucha su bida. Baile tambe ta bon, pasobra tambe ta rekeri di movecion pero ta mas artistico. Pero e mucha tin cu keda move pasobra e ta hopi importante pa e desaroyo di su curpa, cerebro, y pa su estudio, segun e Nutricionista di IBiSA, Iraida Thijsen.
