Santa Rosa a hiba algun pampuna pa dos instancia  

Awacero ta yudando cunucu

ORANJESTAD (AAN): Yobidanan cu ta cayendo na Aruba e ultimo dianan ta trece hopi speranza pa esnan cu tin cunucu.

   Algo fenomenal pa sa, ta cu Departamento Meteorologico Aruba tin instala na Santa Rosa, entre Piedra Plat y Santa Cruz, un ‘weather monitoring station’ cu ta vigila temperatura 24 ora pa dia, y tambe yobida eynan.

   Tirando un bista na Santa Rosa, for di siman pasa Dialuna te Diamars mainta, a registra 3.8 mm (mililiter) di awacero. Desde Diamars te cu Aña Nobo (Diaranson) mainta, a registra 5.0 mm di awacero.  Desde Diaranson pa Diahuebs mainta a registra 0.1 mm di awacero.  Desde Diahuebs pa Diabierna mainta a registra 0.0 mm.  Desde Diabierna pa Diasabra a registra 9.5 mm di awacero.

   Recien Santa Rosa a cosecha poco Pampuna y nan a hiba varios di nan, pa haci entrega nan na e.o. “Cas di mi Chepa”, y tambe na “Stichting Thuiszorg Jaburibari”.  Esaki tabata pa e grandinan por disfruta di un dushi sopi di Pampuna pa habri aña.

   “Planta y duna pa bo por sigi cosecha den abundancia.”  Santa Rosa a cera 2024 satisfecho di e logro nan y determina pa sigui brinda e miho den 2025.