ORANJESTAD (AAN): Diasabra 1 di Januari 2022 tin Santo Sacrificio di Misa pa 7 or di mainta na Kapel di Alto Vista.
Comision di Alto Vista ta desea tur fiel un BON AÑA 2022. Laga nos bin hunto pa celebra Santo Sacarificio di Misa riba e prome dia di aña. Pa un bon comienso nos ta habri e aña cu debocion na nos Tata Celestial y nos Mama Celestial.
No tin nada mas grandi cu Santo Sacarificio di Misa, no tin nada mas grandi cu resa hunto den nomber di nos Redentor Creador di Cielo y tera. Ta tempo pa nos refleha riba nos famia y nos sernan keri, y no lubida esnan menos afortuna.
No lubida esnan cu a perde nan libertad pa un temporada, y esnan di salud mental den nos mes ceno y esnan cu ta biba den nos comunidad cu ningun hende ta duna ningun atencion y speransa. Nos mes mal bicionan cu diariamente tin enfecto riba nos conducta, nos orguyo y demasiado ora di dia ta uza e whatsapp, skirbi mensahe desagradabel, wak television pa oranan largo, tur ta mal bicio, consumo di alcohol descontrola por causa peliger pa e comunidad y por causa problema financiero pa bo mes.
Maltrato di bo mes hendenan y bestia inocente, no uza palabra deshonesto. Ban tur resa, ban drecha bida y duna balor na Oracion. Oracion ta yuda den tur circumstancia.
Ta invita tur hende, deboto y fielnan di nos pais pa asisti diasabra trempan na Santa Sacrificio di Misa, y cuminsa Aña 2022 cu proposito pa un miho bida y gradici Dios pa tur bondad ricibi.
Laga nos resa pa necesidad di Iglesia Universal, pa Papa Francisco, Obispo Luis Secco, tur sacerdote, Diacono y laiconan. Pa nos gobernantenan y tur cu ta carga responsabilidad pa nos pais Aruba. Pa enfermo den exterior cu a bay busca nan salud y pronto nan ta bek na Aruba y gosa di un bon salud. Caba Santo Sacrificio di Misa cu un dande.
