BERLIN: E modelo aleman Alena Yildiz su storia a plama rond mundo, despues cu el a informa cu su amiga a caba di cancela su invitacion pa fiesta di boda.
Esey ta debi cu e ta mustra demasiado bon cu e bisti cu e bruid mes a eligi pa e bay fiesta cune!
Tabata dia 13 di December cu a pasa, cu Alena a publica un video di TikTok, cu tin mas di 17 miyon views caba, unda el a duna di conoce cu su amiga ‘intimo’ a caba di bise cu e no por bay mas na fiesta di boda, y a argumenta cu e tabata mustra “demasiado bon” den e outfit cu e dama mes a escoge pa el a bisti.
Den e video, Alena Yildiz a pone algun potret unda bo ta mira e trahe di gala pa mustra su followers di loke e ta papiando di dje.
E modelo a indica lo siguiente: “Mi amiga di mas cercano a kita bek e invitacion pa su bruid, pasobra e ta pensa cu mi ta luci demasiado bon cu e bisti cu e mes a escoge pa mi.”
Y manera e imagennan a mustra, e trahe di gala cu e muher tabata bay pa usa tabata largo cu un corta estilo curazon, y tabatin adorno di plata y color blauw.
E video riba social media a ricibi miyones di views, y miles di comentario di personanan rond mundo cu a duna comentario riba e situacion aki.
“Tur nos otro amiganan tambe tabata bayendo cu bistirnan extravagante, pero mi ami tabatin problema cu ami so,” e modelo aleman di 21 aña di edad a bisa.
Alena a bisa cu e bistir di color blauw, cu tin un corset cu un linea di nek estilo sirena, y un corta na su bilnan basta halto, a cost’e 1.200 Euro, y cu tur bruidmeisje a paga pa nan mesun paña.
Alena a indica, cu un poco prome cu e fiesta di boda, el a manda un videoclip pa su amiga pa mustre con e ta luci den e trahe di gala, y el a haya un yamada bek unda e amiga ta bisa di ta insigur di e trahe, pasobra e ta halando demasiado atencion.
“Na final despues di e yamada, el a dicidi na cancela mi invitacion pa e fiesta. Nos a pleita pasobra pa mi e cos ey no tin sentido, ya cu ta mi amiga mes a escoge e trahe aki,” Yildiz a bisa, kende a agrega cu e amiga por a escoge un otro bisti pe, si acaso e ta preocupa cu e situacion.
E dia di matrimonio finalmente a yega, y manera e tabata poni, Alena no tabata parti di e ceremonia, y a bisa cu e bruid ya no ta su amiga mas. “El a ponemi sinti comosifuera mi no tin balor p’e como amiga,” el a bisa.
Alena Yildiz a bisa cu e bruid (y cu awor ta ex-amiga) a yame despues di a mira e video riba TikTok y atrobe nan a discuti.
Pa e modelo, esnan cu ta bay casa tin derecho di haci peticion pa e dia di nan casamento, e.o. tin regla cu ningun otro hende mas mag di bisti na blanco, pero e ta sigura cu esaki bo tin di papia riba dje na forma adecua pa evita malentendimento manera el a pasa aden.
