ORANJESTAD (AAN): Den pasado, refineria di Aruba a yega di procesa crudo for di Mexico. Esey ta e epoca cu Mexico tabata exporta hopi petroleo.
Pero awor, informacion e siman aki ta cu Petróleos Mexicanos (Pemex) lo stop di exporta crudo na 2023 pa destina esaki completamente na consumo interno, segun e director general di e compania petrolero di estado, Octavio Romero Oropeza a declara Diamars.
“Practicamente 100% di crudo Mexicano lo wordo refina na nos pais pa garantiza suministro di combustible,” el a bisa den un conferencia di prensa mainta na Palacio Nacional di president Andres Manuel Lopez Obrador.
Director di Pemex a presenta un relato special di e 10 pasonan cu e compania petrolero lo bay tuma pa cumpli cu e ‘transformacion di energia’ di president Andres Manuel Lopez Obrador, kende a priminti cu Mexico lo bay ta full cu autosuficiencia. E funcionario a mustra cu ora el a cuminza cu su Gobierno na December 2018, tabata produci 1.71 miyon bari pa dia, cual cifra awor ta na 1.75 miyon, y cu na 2024 lo bay yega na 2 miyon bari pa dia.
El a bisa tambe cu ora el a cuminza, tabata procesa 506.000 bari y tabata exporta 1.19 miyon pa dia, cual proporcion na 2021 a cambia pa 714.000 bari procesa y 1.019 miyon pa exportacion. “Ya pa 2023 y 2024 practicamente tur e produccion di Pemex lo bay ta wordo procesa, ta bay wordo refina,” el a bisa.
E secretaria di Energia di Gobierno, esta Rocío Nahle, a bisa cu lo bay aumenta e capacidad di refinamento di Pemex cu rehabilitacion di seis refineria existente, esta cu ta incorpora e refineria Deer Park na Houston (Texas), y construccion di Refineria Dos Bocas den parti zuidoost. Cu esaki, Gobierno lo yega 2024 cu e pais mes operando 86% di su capacidad di refineria.
Asina mes, e compania petrolero a perde 4.963 miyon Dollar den e prome nuebe lunanan di 2021, despues di a perde 21.417 miyon Dollar na 2020 den e ‘peor crisis di su historia”, y cu e compania mes a admiti. Tambe a anuncia un inversion grandi pa preveni riesgo, aunke a bisa cu e peligronan den e compania a disminui cu 40% relaciona cu e Gobierno anterior.
Durante aña 2021 so, Gobierno Mexicano a apoya Pemex cu un total di 19.000 miyon Dollar, entre inyeccion di capital, reduccion fiscal, y pago di debe, segun un rapport publica pa Moody’s. “Cu e reduccionnan aki den impuesto nos ta bay por cumpli cu e oferta di señor Presidente den sentido cu prijsnan no subi riba e terminonan real na e pais,” ta loke Romero Oropeza a bisa.
President Lopez Obrador a bisa cu na Januari venidero e lo bay invita na su conferencia tambe, e 22 aspirantenan na Sindicato di Pemex.
