Parlamentario Jeniffer Arends-Ruiz:
ORANJESTAD (AAN) Parlamentario Jeniffer Arends-Reyes, di fraccion di AVP, den entrevista cu DIARIO, a señala cu den e transcurso di añanan a inverti hopi den e parti social y tambe e tempo cu tabata tin pandemia.
No obstante, el a subraya cu e situacion social y economico cu Aruba ta aden, ta hopi delicado, y por mira cu tin mayornan cu ta “struggle” y ta pasa den bastante trabao y tin di nan cu tin diferente trabao pa atende nan necesidadnan familiar.
“Pa locual ta trata e aspecto di ayudo di scol, prome cu vakantie grandi a cuminza y t’asina cu Departamento di Asunto Social, hunto cu Gobierno di AVP-Futuro, a anuncia diferente aumento substancial den ayudo pa esnan mas vulnerable. Esaki, hunto cu costo di bida ta un ayudo pa wak unda cu por mehora”, Arends-Reyes a indica.
Pa loke ta trata e muchanan vulnerable, e parlamentario a expresa cu e cantidad grandi aki ta alarmante, y tin un investigacion andando unda cu tin cu wak e calidad di bida di e mucha.
“Esaki ta un tema pa mi tambe. Semper den e transcurso di añanan mi a dun’e atencion; di parti di UNICEF y di parti di scolnan, y di mayornan tambe. Con e rol di mamanan soltero tambe ta hunga un rol. E parti di data tambe nos a papia hopi di dje, e aspecto di registracion pasobra t’asina cu tin mayornan serio, y tin cu ta busca e parti di ayudo tambe, den fundacionnan externo. Nos a wak cu Fundacion pa Nos Comunidad tambe a haya mas di 400 mil florin, cu ta un ayudo substancial, durante tratamento di presupuesto cu a pasa, pa FPNC cu tambe ta brinda e ayudo aki”, Parlamentario Arends-Reyes a señala.
El a agrega cu por wak cu tin un grupo grandi, creciente, den e fundacion aki, pero tin otro fundacionnan cu nan no tin bista riba nan.
El a subraya cu manera el a splica tin mayornan cu ta serio, y tin otro mayornan cu por bisa, cu tal vez ta bay “shop rond” den diferente fundacion.
“Esaki sigur ta un fenomeno cu durante transcurso di añanan tin atencion riba dje, pasobra esaki no ta e meta. Pero tambe, segun e tema su complehidad, tambe ta dificil pasobra mester wak diferente aspecto. Pero sigur, den e parti social Aruba tin un reto grandi ainda pa nos bay cumpli cu nos muchanan y cu esnan cu ta bay scol tambe”, Arends-Reyes a señala.
