Sala Safiro na Biblioteca Nacional Aruba a inaugura su di cuater periodo di exposicion

ORANJESTAD (AAN):   Esaki ta e di cuater biaha cu Biblioteca Nacional Aruba ta ofrece na comunidad un bunita exposicion den Sala Safiro.

E exposicion nobo aki a inicia fin di december, pero mirando cu esaki tabata un luna basta ocupa, e comision a dicidi pa bin bek cu e promocion den luna di januari.

Yosmar Sneek a remarca cu e exposicion ta keda cambia cada 4 luna den Sala Safiro. Ta trata di tres exposicion chikito, pero cu un bon contenido.

Sala Safiro ta un sala cu tur hende por haci uzo di dje pa  reuni, relaha, lesa buki, studia, lesa revista, busca den computer  y den e guia  mas informacion tocante e exposicionnan y di e biblioteca mes.

E aña aki tin un seccion nobo  cu yama ‘Algo mas’ y riba esaki Marlon van der Linden, tambe di e comision, a indica cu pa loke ta contenido a bin cu e idea pa trece dilanti tres tema y cada pasa un tempo ta keda renoba.

Asina a dicidi inicia cu e tema di Pasco, Aña Nobo y Carnaval. “A busca informacion den cortico y a haci un sinopsis di cada tema treciendo dilanti loke ta mas relevante (...), ademas di imagen, adorno na banda pa representa den cortico tur cos”.

Un di e personanan cu a expone e biaha aki un bunita tema den Sala Safiro ta e compositora Glenda Zavala-Maduro, kende ta forma parti di e departamento di SMD na Biblioteca Nacional Aruba na George Madurostraat. 

Segun Glenda, su exposicion aki tabata un soño cu a bira realidad ya cu na un edad hopi jong e tabata den diferente les y grupo di canto. El a logra canta den algun festival di canto tambe. E motivacion a continua y na un edad grandi el a haya un pasion pa compone cantica y te hasta el a wordo certifica door di SENA (Colombia) na 2024 como compositor profesional den e genero Vallenato.

Awendia, na Colombia, hopi hende ta pidie pa compone cantica pa nan, el a bisa. “Aña 2025 tabata un aña formidabel den mundo di musica pa mi. Mi a wordo premia door di Premio Musica Colombiana dos biaha como compositora y gestor cultural”, Glenda a indica.

Na Aruba e sa participa tambe den diferente evento manera Poeta di Patria. E tin un scol di musica pa hende muher empodera cu ta un exito rotundo.

E trayectoria di Glenda, den corto, por wordo admira den e expo nobo den Sala Safiro. 

Un otro exposicion nobo ta esun di Jarmin Croes-Tromp, kende ta traha na balie na Biblioteca Nacional na San Nicolas. El a splica cu e tema di su expo ta ‘40 aña di Status Aparte’.

Pa traha riba esaki el a sinta casi un dia completo na Departamento Arubiana-Caribiana caminda el a haya tur informacion riba kico a pasa na aña 1985. Su expo ta contene informacion riba tur e gobernantenan di Aruba for di aña 1986 te cu awe y ken tur a lucha pa Aruba logra su Status Aparte.

Su deseo ta pa pueblo mes duna ‘feedback’ di kico nan kier mira na biblioteca, Jarmin a expresa.

Shamilla Williams tambe ta forma parti di e exposicion den e seccion cu yama “Cashi pa Comunidad’ como embahadora di ‘Dia Internacional di Hende Homber’ cu ta celebra dia 19 di november.

El a splica cu na aña 1999, a bin cu e idea di haci algo pa hende homber y awendia tin rond di 81 ambassador na diferente pais. Nan funcion ta haci eyfo conoci cu nan kier observa e dia y kico kier logra.

Durante pandemia, a bin cu e iniciativa pa haci algo na Aruba. Esey ta e rason pa pone e expo chikito aki den Sala Safiro pa mustra loke a logra for di aña 2020 pa cu dia di hende homber, Williams a indica.

E organisacion ta traha riba salud mental, igualdad di genero y e aña aki ta bay enfoca hopi riba andropause, cu ta un tema hopi desconoci pa hende homber.

Un invitacion pa pueblo pa pasa wak e exposicionnan aki na Biblioteca Nacional Aruba na George Madurostraat. Sala Safiro ta habri pa publico dialuna y diaranson di 8 am te cu 7 pm y diamars, diahuebs y diabierna di 8 am te cu 5 pm. Pasa bishita y admira e bunita exposicionnan cu temanan hopi interesante pa comunidad.

Esnan interesa pa pone un exposicion den e espacio ‘Cashi pa Comunidad’ por yama 528-1500 y puntra pa Marlon, Giselle of Yosmar.