Michella Croes di Fundacion Zinnia:
ORANJESTAD (AAN): E campaña di conscientisacion ‘Supla pa Bida’ di Fundacion Zinnia, desde cu a keda lansa aña pasa, tin hopi exito, segun Michella Croes di Fundacion Zinnia a menciona den un entrevista cu DIARIO. El a splica cu ‘Supla pa Bida’ ta un instrumento pa conscientisa ciudadanonan pa para un rato y realisa cu nan no ta apto pa stuur auto si nan ta bou di influencia di alcohol.
Señora Croes a enfatisa cu cada persona tin e opcion pa scoge. Sea e ta dicidi pa no stuur pasobra el a bebe of e ta uza amigo Didi of un amigo responsabel pa hib’e su destinacion. Supla pa Bida por yuda e persona pa haci e escogencia aki.
E campaña ‘Supla pa Bida’ actualmente tin un duracion di tres luna caminda ta haya un aparato pa supla. Esaki lo ta gratis durante e tres lunanan aki. E aparato ta midi e cantidad di alcohol door di analisa rosea. E intencion ta pa despues di e 3 lunanan aki, por cumpra e aparatonan aki na boticanan. Fundacion Zinnia a haci e campaña aki den cooperacion cu New India Assurance, Botica di Servicio y KPA.
Despues di Carnaval, lo haci encuesta pa haya un bista con hopi esaki a wordo uza y kico ciudadanonan ta pensa di esaki y kico ta e sugerencianan cu por haya di esnan cu a uz’e. “Esaki lo yuda nos hopi y via nos fundacion, bos di pueblo por ta eyfo. Nos ta spera cu e ta keda bon acepta den pueblo y keda standard pa cumpra den boticanan rond Aruba”, señora Croes a expresa.
