Ryçond Santos do Nascimento ta contradeci ponencia Miguel Jose Mansur --- Ora cabaron bisa con pisca ta putri den lama, hende mester scucha --- Bida bao awa tin su propio secretonan y hasta su propio holo
ORANJESTAD (AAN)- Con peligroso e situacion cu hende no por mira bou awa ta, sigur ta algo cu ta conoci pa e Arubiano.
Tin motibo cu un hende huicioso segun e proverbio, mester scucha ora cabaron papia di holo y situacion bou awa.
Ta cu hopi interes Aruba a tuma nota con durante siman di Pasco, e ponencia di Miguel Jose Mansur den Parlamento a wordo contradeci.
Miguel Jose Mansur algun tempo pasa a presenta un thesis, cu tabata basa riba su pensamento cu pa un persona bira Ministro na Aruba, e mester tin estudio universitario.
Cu e pensamento ey politica lo a bira un asunto di rango y posicion y lo a deshaci di tur Arubiano sin placa of caminda habri pa sigui un estudio universitario.
Cu estudio no ta garantia di e calidad di politico cu Aruba por spera, a keda demostra pues pa Rycond cu tin diferente titulo di sabiduria. Sinembargo, cerca e grupo di ciudadano Arubano cu no ta berde, el a score hopi malo siman pasa ora el a papia di e forma cu pisca ta cuminsa putri na cabez pa asina ataca Prome Ministro Evelyn Wever-Croes.
Pa ta sincero, cantidad di atake cu Prome Ministro Wever-Croes ta haya di parti di su oponentenan politico, ta prueba cu e ta haci un bon trabou y cu nan tin miedo di loke e ta nifica como politico.
Cientificonan ta bisa, cu ora bo ta ataca sin base y hasta ta baha bo nivel te na suela, bo tin miedo di loke bo kier kibra.
Nos lo no kier bisa cu Rycond no ta suficiente inteligente pa tin tur su titulonan. Nos no ta kere den e tipo di weganan barata cu lo mester pa haci e expresionnan cu mas y mas e ta haci.
Loke si nos ta duda seriamente ta, si Rycond ta cualifica pa representa Aruba como politico y gobernante den cualkier posicion, teniendo cuenta cu su expresionnan y contenido di loke el a trece dilanti.
Cual ta e sabiduria cu Rycond kier a entrega Aruba cu su ponencia cu “pisca cuminsa putri na su cabez”, manera lectornan a trece dilanti?
Cu bou awa cosnan straño ta pasa, ta algo conoci na Aruba, cu ta kere mester tene cuenta cu advertencianan di cabaron ora cabaron ta papia di e holo cu tin bou awa.
E cabaron ta biba bou awa. E ta conoci cu e circumstancianan di holonan menos agradabel bou awa, caminda conocedornan di bou awa ta conoci cu e proceso con pisca ta putri.
Si cabaron no ta bou awa, e no ta sa kico putri ta nifica.
Ora bo ta bou awa, bo ta conoci cu e realidad cu tin un mundo cu hende no por mira. Un mundo cu ta wordo abusa dor di politiconan cu ta cana brasa hende, pa na mes momento destrui e bienestar di hende.
Ora bo ta den fondo di lama, bo conoce e holo di pisca putri cu ta un peliger pa hende. Bo ta bira manera cabaron, cu por adverti hende pa e holo di fondo di lama.
Awe Aruba ta pasa den un situacion cu ta exigi un cambio den politica cu a bira abuso y ta haci cu hende mester enfrenta hende pa nan por sigui cana hasta na momento cu tur hende ta papia di paz.
Aruba a soporta e abuso financiero cu a laga e pais den estado di bancarota. Aruba a soporta e abuso di intelectualnan cu ta bandona nan nivel cu mester ta ehempel pa otronan.
Un futuro nobo mester wordo crea. Un futuro cu ta depende tambe di role models, ehempelnan cu por wordo expone na pueblo no pa e titulo cu nan tin ni e placa cu nan por gana, pero pa e nivel cu nan ta desplega.
Un nivel cu no por haya bou awa!
