ORANJESTAD (AAN) – Despues di a celebra Pasco di Nacemento, dia 25 di December, Dialuna 26 (di dos dia di Pasco) Iglesia Catolico ta celebra e Dia di Sagrada Famia.
Durante e Santo Sacrificionan di Misa di e di dos dia di Pasco di Nacemento, e Sacerdotenan a enfoca riba e Sagrada Famia, den nan predicashi.
Por ehemplo, a haci referencia na e Buki di Eclesiastico 3.3, cu ta bisa: “Esun cu ta respeta su tata ta expia su picanan, y esun cu respeta su mama ta acumula tesoro”.
“No abochorna bo tata tanten bo ta na bida, maske su mente ta flakia”, ta palabranan observa den e Santo Misa. Pues, enfasis a wordo haci riba e Sagrada Famia y su Mision na mundo, y cu awo mas cu nunca ta necesario pa evoca su intercesion y presencia den e hogarnan, ya cu nos biba den un mundo unda e placernan terenal ta mas importante cu Dios y cu e famia, y asina e materialismo, e gana di adkiri tur cos como sifuera esey ta garantiza e felicidad.
Awo, tur cos ta posible. Mundo ta evoluciona, segun un pensamento basta generaliza, di manera cu e balornan con cual hopi famia Cristian a lanta, no tin importancia mas, y esnan cu ta persisti ta “obsoleto” no a moderniza su mes.
Den e temponan dificil cu mundo ta bibando y sigur Aruba, door di e pandemia aki cu a trece hopi problema social, economico, emocional, spiritual, ta sumamente importante pa wak tur cos cu e wowonan di Evangelio, pa tuma e Sagrado Famia como ehemplo, y rectifica hopi comportacion cu no ta bay hiba e humanidad na ningun triunfo.
Pensa riba e Sagrada Famia ta pensa riba misericordia, obediencia, bondad, humildad, dulzura, comprension, union familiar, empatia, pordon manera Señor Jesus a pordona nos tur nos picanan y entrega su bida pa nos Salvacion. Y riba tur cos e Amor, e Palabra, e Eucaristia. “ Yiunan, obedece bo mayornan, cu esey Dios ta gusta. Mayornan, no bira posesivo, pa no desanima boso yiunan, pero tampoco sobreproteha nan na exceso, pasobra nan lo no crece, y lo mester di boso tur ora pa tur problema, y na tur edad”.
Algo masha bunita cu por a scucha den un par di predicashi di Diadomingo, ta cu e prome scol unda nos ta siña ta e hogar, e famia, y ningun hende ni nada, por substitui e enseñanzanan di balor y principio, cu for di chikito e persona ta siña di su famia.
Por ehemplo, e ta siña e respet pa tur hende, e bon manera (bisa danki, por ehemplo). Ora un mucha lanta sin respet, nunca e ta gradici cu nada pasobra e ta kere cu tur cos e merece y asina e ta lanta y su mayornan tin cu carga e mucha ey su responsabilidad te na grandi. E Sagrada Famia ta e miho modelo pa sigui, tanto Hose como Maria Santisimo, a eduke cu Amor y disciplina, inspira pa Dios Tata. Mescos tur famia na mundo cu ta kere den Dios Tata por wordo inspira, manera e Sagrada Famia, pa lanta nan famia den santidad.
