ORANJESTAD (AAN): E ehercicio pa emergencia den tempo di horcan cu Defensa den Region Caribe
ta tene durante e periodo di 15 di September te cu 27 September, temporalmente a cambia na un despliegue real na Isla Riba.
Autoridadnan local di Saba y St. Eustatius a haci un peticion na Defensa pa brinda sosten Militar rond di e pasada di Tormenta Fiona. Den esaki ta espera hopi rafaga di biento y hopi awacero, y cu esey ta espera tambe un cantidad grandi di destruccion y estorbo. Defensa ta actua den e despliegue aki hunto cu socionan local di seguridad.
Saba a pidi Defensa pa sostene nan cu limpiesa di terenonan y haci e cayanan liber. Tambe tin e necesidad na eventual sosten durante trabaonan chikito di recuperacion, tanto prome como despues di pasada di e tormenta.
Saba tin un infrastructura limita, y p’esey ta di importancia pa rapidamente haya e cayanan liber pa e servicionan di yudansa cu tey presente ya caba. Un cantidad di 30 Marinier y un enfermero Militar di Marina Real ta presente.
Militarnan Hulandes lo brinda na Sint Eustatius tambe sosten militar den forma di posibel yudansa di emergencia. Pa motibo di e awacero y biento cu ta pronostica tin chens riba daño na edificionan y pues tambe un potencial peliger pa habitantenan.
Loke por ehempel por ta un problema grandi riba e isla, ta corientenan di lodo, inundacionnan y desplazamento di tera. Aki tambe Defensa, cu ya ta presente, por haci un diferencia y proporciona e isla cu e posibel yudansa di emergencia.
Defensa lo brinda un Consehero pa e staf di desaster pa por laga cu e colaboracion entre autoridadnan local y Defensa por cana flexible. Mas aleu mas o menos 30 Marinier, caminda ta necesario, lo actua como team hunto cu Polis y Brandweer, pa ehecuta diferente tarea.
Na Sint Maarten na e momentonan aki no tin necesidad concreto ainda pa sosten Militar, pero e unidadnan ta para cla pa eventual peticionnan pa por ehecuta esakinan. Si en caso no tin necesidad di un despliegue di parti di Defensa na Sint Maarten, e programa de ehercicio lo keda reanuda.
E Militarnan cu ta keda desplega ya ta presente caba riba e islanan pa motibo di un training pa brinda yudansa di emergencia durante pasada di un horcan. Cu tin e titulo di ‘Windward Express’. Ora e situacion ta permiti esey, e unidadnan procedente di Aruba, Corsow y St. Maarten lo bolbe reanuda e ehercicionan (parcialmente).
Sosten na autoridadnan local ta un di e tareanan primordial di Defensa den Region Caribe Hulandes.
