E peliger di e dictador cu a declara cu Aruba ta teritorio Venezolano
*Comunismo a comberti 6 Miyon Venezolano den “hende sin tera”
*Aruba mester di garantia internacional pa habri frontera Venezuela
ORANJESTAD(AAN)—Hulanda tin e deber pa ta atento cu Nicolas Maduro ora ta trata bienestar di Aruba pa un motibo masha serio.
Como Presidente di Venezuela, Nicolas Maduro a declara cu Aruba ta parti di teritorio Venezolano ya cu Aruba ta cay den e zona maritimo di Venezuela.
Na Velezuela mes nan lo a bisa cu “Mas claro no canta un gallo”.
E declaracion di Nicolas Maduro, cu a duna prueba cu e no ta respeta ni su mes, mester tabata motibo pa Reino Hulandes a percura pa seguridad total pa Aruba.
Historia ta entrega nos e pruebanan pakico nos mester ta cauteloso cu situacionnan manera Aruba conoce y pakico e frontera di Aruba mester ta na double lock ora ta papia di posibilidad di infiltracion malicioso.
Pa atende cu awe y crea un futuro, no mester lubida loke a pasa den pasado, cu ta duna prueba kende ta Nicolas Maduro.
Aruba a haya ehempel bibo na momento cu Gobierno Mike Eman a bay firma un acuerdo pa e refineria di Aruba cu Nicolas Maduro cu asina a haya oportunidad di kere cu pa medio di economia e por a conkista Aruba.
Nicolas Maduro ta un fugitivo di autoridad di Merca. A lubida e posternan den cual ta aparece Nicolas Maduro como persona cu ta wordo busca pa autoridad Mericano?
Kico a pasa cu placa di Citgo, cu Gobierno Mericano tin bou su custodia?
Pakico Merca, Europa, mundo liber a tuma medidanan contra Gobierno di Nicolas Maduro? Pasobra e ta San Nicolas?
Kende ta aliadonan di Nicolas Maduro, cu no a wordo invita mescos cu ta e caso cu Putin pa asisti na entiero di Reina Elizabeth II?
Awe Venezuela ta wordo confronta cu dos problema serio y pa soluciona e dos problemanan aki no por dera cabez den santo.
E sistema comunista cu a wordo introduci na Venezuela a desgracia uno di e paisnan mas rico di America Latina.
Aruba conoce e Venezolano como turista cu tabata bini Aruba pa cumpra productonan caro y pasa vacacion.
Tabata tin un grupo pober na sigur Caracas, pero esaki no ta valido pa henter Venezuela, cu den campo por ehempel tabata biba como hende liber cu produccion di tanto articulo cu awe ta den man di dictador Nicolas Maduro, cu a deshaci di tur propiedad di tur Venezolano.
Labamento di placa y otro crimennan serio ta wordo atribui na e grupo di Nicolas Maduro den acusacionnan internacional, cu aparentemente nos tur a lubida.
Awe mundo ta wordo confronta cu e otro parti di realidad di Venezuela. E poblacion di Venezuela cu a bira victima di robo di su derechonan na man di Nicolas Maduro cu a nacionaliza loke tabata di e Venezolano.
“Homber y muhernan sin tiera” ta loke Socialismo ta uza como logo uni na “Solo el Pueblo salva al Pueblo” cu ta e antifaz di comunismo pa lidernan sin escrupulo destrui e bienestar di Pueblo manera a pasa na Venezuela.
Con Aruba por habri frontera pa Nicolas Maduro cu tin control riba entrada y salida di su pais?
Si tur Venezolano por bandona nan pais, pakico nan ta haci esaki den boto of den filanan scondi? Acaso e placa cu nan ta paga na hopi bez organisacion criminal pa por huy di Venezuela no ta mas cu e placa pa cumpra un pasashi pa Aruba y regla un estadia na Aruba ora haya trabou?
E Venezolano fugitivo, cu no kier muri na Venezuela, lo kier biba como fugitivo di ley na Aruba of e kier biba trankil?
Kende Nicolas Maduro ta permiti bini Aruba cu pakete di droga y arma pero bou di capa di refugiado?
Reino mester bay Nacionnan Uni y exigi accion di Nacionnan Uni prome cu Aruba por habri su portanan cu Nicolas Maduro na mando.
Nacionnan Uni mester bira un instrumento contra dictadura y no por tin dictador como participante.
Nacionnan Uni tin den nan man e instrumentonan pa garantisa paz mundial, cu ta wordo kibra dor di lidernan politico falso di paisnan cu ta cay den trampa di “solo el pueblo salva al pueblo”.
Nacionnan Uni mester sostene e defensa di e Venezolano na Venezuela.
Reino Hulandes mester mira na prome lugar e bienestar di Aruba.
No por habri porta di Aruba pa un tirano, un dictador, cu no a respeta ni su mes Pueblo y a declara publicamente cu Aruba ta teritorio Venezolano!
