Calor intenso ta avisa Aruba cu September ta luna di horcan
*Saba, Sint Maarten y St. Eustatius prepara pa condicion severo
*Biaheronan pa Merca y region y usuario di boto mester sigui noticia
ORANJESTAD(AAN)—Ya prome cu inicio di temporada di horcan 2022, region di Caribe, Golfo di Mexico, America Central y Merca, tabata den estado di alerta.
Condicionnan na 2022 a wordo anuncia di ta favorabel pa un temporada pisa di horcan, cu a haci cu Aruba tambe tabata den estado di alerta.
Santo di Sahara lo tabata un factor cu a stroba e desaroyo di mas tormenta durante e prome lunanan di e temporada 2022, cu a mira basta formacion cu por a bira sistema tropical, opta pa keda riba Oceano.
Cifranan cu Servicionan Meteorologico di e region Atlantico den cooperacion directo cu National Hurricane Center a compila, ta mustra cu September ta e luna cu mayor actividad.
Casi mitar di e sistemanan tropical cu forma durante un temporada, ta registra na September y sigur na entrada di e segundo parti di September manera actualmente ta e caso.
Importante ta tambe cu ta den e temporada aki ta registra mas horcan cu ta bira fuerte y ta alcansa categoria di horcan sumamente peligroso.
E calor intenso na Aruba sigur tabata un advertencia durante algun dia, cu un sistema ta na caminda pa region di Caribe, cu durante e ultimo dianan a cuminsa prepara pa Fiona, e tormenta tropical cu segun informacionnan tin posibilidad grandi pa bira horcan.
DIARIO durante ultimo dianan tabata den contacto directo cu e islanan Saba, Sint Maarten y Sint Eustatius, cu a cuminsa tuma e medidanan di prevencion.
Imagennan cu nos a cuminsa ricibi ayera di colaboradornan na Sint Maarten a mustra un aumento den e capanan blanco di olanan di lama, hunto cu biento e dos factornan mas peligroso di un horcan.
DIARIO a keda pendiente tambe di tur informacion di National Hurricane Center, cu a adverti cu e condicionnan ta favorabel pa Fiona sigui haya forsa mientras e tabata acerca e parti mas Noord di region di Caribe.
Contrario na e parti Zuid di region di Caribe, caminda Aruba ta situa y cu ta keda cerca di continente, sigur e islanan chikito na entrada y na e parti Noord di Caribe, no tin e terenonan cu mester pa kibra e forsa di un horcan cu mester di e awa cayente di lama pa sigui crece.
A yega di socede cu henter un isla tabata den wowo di un horcan pisa y hasta visibel riba portretnan, loke ta nifica cu un isla chikito tin problema serio pa frena un horcan.
E pronostico pa Fiona tabata ayeratardi cu durante e proximo 48 oranan e por a sigui haya forsa.
Na momento cu e yega cerca di e costa di Hispaniola (Republica Dominicana) e ta topa tereno cu por afecta su forza.
Ta depende con e ta yega Hispaniola, cu ta e punto cu ta pone mas cerca pa Noord di Aruba (pa loke ta trata pues longitud y no proximidad peligroso) y cu ta e punto caminda e lo por baha su velocidad pa e por cuminsa bay halto manera e imagen ta mustra.
Si e modelonan cu ta uza pa pronostico haya razon, e lo dicidi pa bay costa di Florida y haya mas forsa riba e ruta aki.
Pa bianeronan pa e region di Caribe y e parti Oeste di Merca(Florida) un advertencia ta bay pa sigui condicionnan di tempo y di lama.
E efectonan secundario di un tormenta y horcan, cu den e caso di Fiona tambe ta presente, ta e resultado cu e tin pa lama y sigur e corientenan di lama.
Na Aruba mes, mester tene cuenta cu calor extremo cu uni na un aumento di humedad, ta condicion pa percura pa yobida cu si e no causa problema pa trafico por ehempel, den e calor por bira un alivio pa Aruba.
Pero mester vigila condicionnan di lama debi na efecto cu Fiona por tin riba coriente di lama.
Na momento cu e articulo a wordo redacta Diabierna atardi, tormenta tropical Fiona tabata na entrada di region di Caribe, cu lo a drenta un fin di siman di yobida y condicionnan severo di tempo.
Ta haci e mencion aki debi na cambionan cu semper por tin den sistemanan tropical, cu mester wordo vigila continuamente ora nan ta den e region.
