Partido cu nan a sostene, a entrega Mike Eman e Famoso 1.6 Biyon
- Futuro di Aruba den panorama mundial no ta permiti oportunismo
- Nan tin un debe nacional cu futuro destrui pa nan ex lider
ORANJESTAD (AAN)- Na momento cu un persona dicidi cu e kier participa na un partido politico, e mester di e vehiculo necesario.
Leynan di Aruba ta exigi pa un persona ta miembro di un partido politico, pa e por participa na un eleccion.
Base pa participacion na eleccion, pues cu e deseo pa ta parti di gobernacion di un pais, mester ta e deseo pa traha na beneficio di un pais como sirbidor di un Pueblo, cu ta paga salario di su gobernante of representante cu ta vigila gobernante den Parlamento.
Ora papia di beneficio di un pais, mester mira kico ta na fabor y kico ta contra bienestar di un pais segun pasado, presente y loke futuro lo por encera.
Actualmente Ryçond Santos do Nascimento y Gerlien Croes ta dos strea cu a cuminsa briya na firmamento politico di Aruba, na momento cu nan a dicidi pa drenta e orbita politico di Mike Eman.
Na e momento cu nan a presenta nan mes como e generacion nobo cu ta pone su mes na disposicion di e partido AVP di Mike Eman, como hende cu tabata tin e oportunidad pa avanza intelectualmente pa medio di estudio, nan a dicidi cu nan ta sostene Mike Eman y tur loke Mike Eman ta representa.
Pa defini loke Mike Eman ta nifica den historia politico di Aruba, mester tira un bista riba loke Mike Eman a ricibi na su inicio di gobernacion y loke el a laga atras ora el a despedi di politica.
Si Ryçond y Gerlien, a pone nan mes na haltura di loke tabata pasa na Aruba prome cu nan a dicidi cu nan kier sirbi Aruba, nan mester a tira un bista riba e motibo cu Mike Eman cu awa na wowo, a despedi di politica di Aruba y di liderazgo di su partido na 2017, loke a haci cu Evelyn Wever-Croes mester a bira Prome Ministro di Aruba.
Mike a bay y a keda un periodo basta largo for di bista di Aruba, pasobra votadornan di Aruba a dicidi cu ta basta y cu nan por permiti Florin zink hunto cu Aruba den e tempestad financiero cu Mike Eman a entrega Aruba como herencia.
Tabata na man di Mike Eman, cu a destrui e fundeshi financiero y economico di Aruba, cu Ryçond y Gerlien a introduci nan mes como candidatonan di AVP.
Tabata na man di Mike Eman, cu Ryçond y Gerlien a bira conoci na Aruba, cu tabata mira den nan persona hasta e candidatonan pa sucesor di Mike Eman.
Ryçond y Gerlien a aplaudi y a pidi Pueblo sosten como parti di e vehiculo politico di Mike Eman, despues cu Mike Eman casi a percura pa entiero di Florin.
Si no tabata pa intervencion Hulandes, cu tabata mas fuerte cu e sistema digestivo di Mike Eman cu a drenta Huelga di Hamber, Aruba lo a bati bancarota na forma oficial, manera Hulanda mes a splica.
Futuro di Ryçond y Gerlien den politica, no tabata loke nan tabata busca aparentemente y e avestruz di Benny Sevinger finalmente a duna nan un ocasion pa habri nan hala y scapa di e neishi berde, e curazon berde, cu Huez a manda prison.
Esaki ta e storia politico real di Ryçond y Gerlien, cu awe kier pidi sosten di e Arubiano pa nan bolbe den poder politico.
Atake ta wordo lansa contra e maneho cu a haci posibel, pa hasta den pandemia y den un mundo cu ta spart for di otro pa motibo di falsedad politico entre otro, nan por keda cu nan entrada den Parlamento y hasta bira gobernante di Aruba.
Kico nan por haci pa Aruba? Pasado semper ta entrega loke por spera den futuro. Ayera Gerlien y despues Ryçond a sostene Mike, na entrada di dos eleccion cu Mike Eman a perde despues cu Hulanda pa motibo di Mike Eman, a introduci supervision financiero na Aruba.
Kico ta pasa cu honestidad y principio? Un pregunta pa resumi motibo cu tanto hende ta papia di hipocresia ora Gerlien y Ryçond lanza atake politico y aparentemente lubida cu nan tabata baluarte di e motibo principal di e crisis financiero di Aruba, cu awe mester soluciona y lo afecta futuro di e pais!
