E dignatario a splica pakico e Wetboek aki ta sumamente importante
ORANJESTAD (AAN) — Minister di Husticia y Asuntonan Social, señor Rocco Tjon, tabata presente Dialuna mainta, na e inicio di e opleiding, pa loke ta introduccion di e “Arubaans Wetboek Strafvordering” nobo cu a tuma lugar na Hyatt Place.
E dignatario a expresa cu esaki tabata un momento sumamente importante pa loke ta e cadena hudicial. El a señala cu ta hopi importante pa inverti den e organizacionnan y percura pa tur e personal tin material pa eherce nan trabao, y mes of mas importante ta pa nan tin e base legal. Pues, e parti legislativo tambe ta regla.
“Nos ta inicia e proceso aki pa na Maart 2024, Aruba como prome pais den Reino, introduci e wetboek nobo aki. T’a asina cu for di 2013 esaki a cuminza door di un comision cu a entrega nan consehonan na 2014. Pues, na 2024 esaki por a wordo entrega na Raad van Advies, pero esey no a tuma lugar. Sin mas esey a tuma lugar na 2018 caminda ex-minister señor Bikker a entrega esaki. Raad van Advies a entrega nan conseho cual a wordo trata, y na 2020 Parlamento a aproba e ley aki”, Minister Rocco Tjon a señala.
E dignatario a sigui splica cu obviamente, prome cu entrega e ley, importante ta pa bo tin tur e randvoorwaarden in place, y un parti hopi importante, mirando tur e cambionan cu ta tuma lugar, ta pa percura cu tur esnan cu tin cu traha cu e ley aki, ta bon educa y nan haya un splicacion amplio di e materia. “Pesey mi ta satisfecho cu nos por a bin cu diferente comision, cu a elabora extensamente riba esaki. E comision aki ta consisti di Ministerio Publico, Cuerpo Policial, Ministerio di Husticia y Asuntonan Social, pero tambe Corte; y hunto, nan a percura pa diseña e opleiding cu awo ta inicia”, e dignatario a relata.
E mandatario a agrega cu durante dos siman, Universidad di Aruba hunto cu Ministerio Publico lo percura pa riba 200 persona cu ta traha den full e cadena haya e curso cu tur e materia aki, pa na Maart 2024 tur ta prepara y por inicia cu e proceso aki. “Pakico esaki ta importante? Pasobra e derechonan pa loke ta trata e victimanan ta wordo miho hancra den ley, y ta bira mas facil pa nan por, durante e casonan, tin e derecho pa comparti nan historia pero tambe haya recompensacion y banda di esey ta introduci metodonan nobo, pa loke ta tools pa polis y Ministerio Publico, haci miho investigacion. Kiermen, cambionan sumamente importante pa di e forma aki nos por combati criminalidad mas miho, y sigui e reduccion den criminalidad cu nos ta mirando aworaki”, Minister Rocco Tjon, titular di Husticia y Asunto Social a bisa.
Finalmente e dignatario a expresa cu bunita di e wetboek aki ta, cu e ta haci nos pais mas resiliente den e situacion actual y tambe pa tene cuenta cu fenomenonan pa futuro. Por ehemplo e parti digital y cybernetico , esnan cu ta investiga e casonan aki, ta bay tin mas tools pa nan percura pa e investigacionnan aki ta mas solido
