RVO di Hulanda a bin duna informacion tocante oportunidadnan di subsidio pa exportadornan di Aruba

Exprodex cu guestnan di  Hulanda:

 *Awe ultimo dia cu “1on1 meeting” cu Soelan Daal pa esnan cu ta cla pa exporta

ORANJESTAD (AAN) Señor Giacomo Pais, Policy Advisor” na Exprodex (Departamento Asuntonan Economico Aruba) a duna di conoce, den entrevista cu DIARIO, cu nan tin guestnan di RVO Hulanda (Rijksdienst Voor Ondernemend Nederland) cu a bin Aruba specialmente pa duna informacion tocante tur e oportunidadnan cu tin, encuanto subsidio, vouchers, y informacion cu nan ta brinda na hendenan di Aruba, pa yuda nan exporta for di Aruba.

Pa tur e subsidionan aki por aplica door companianan existente na Aruba, anto nan por haci uso di esaki p’asina yuda nan exporta.

“Nan tin tambe informacion gratis. Tin un helpdesk cu ta señora Soelan Daal, cu ta na Aruba awe, y e ta semper habri pa duna informacion, haya yamada y video calls online, na tur hende di Aruba cu ta interesa na exporta y tur e oportunidadnan cu RVO ta duna hendenan di Aruba”, Giacomo Pais a señala.

E dia aki tabata tin encuentro cu personanan di e sector di Agricultura, miembronan di Formers Uni, y Comerciantenan Uni (CUA) tambe, y cu profesionalnan hoben cu tambe ta interesa den e tema aki.

Diamars tambe tabata tin anochi informativo na Surfside Marina, na unda cu señora Daal tambe a presenta y Minster di Economia y Finanzas Geoffrey Wever tambe a bin pa duna e discurso di apertura.

“Tabata tin cantidad di hende cu a presenta nan mes pa haya e informacionnan aki. E oportunidad aki tabata tremendo pa tur comerciante na Aruba, cu ta interesa pa exporta”, Giacomo Pais a acentua.

Diahuebs ta e ultimo dia, unda cu señora Daal lo tin un “one on one meeting” cu personanan cu ta cla pa exporta, pa adkiri mas informacion specifico.