ORANJESTAD (AAN): E siman aki e condicion di lama ta parce di ta ideal pa pesca.
Riba Diadomingo, e rumannan Perez a subi lama cu nan boto di un outboard motor y no mucho leu pabao di Highrise Hotelnan, a lucha y a captura un impresionante pisca conoci como “Caraña”, y na ingles como “Cubera Snapper”. E ta un di e piscanan mas premia den mundo di pesca.
Tur dos ruman a saca potret cu e pisca grandi aki, y riba nan cara por nota cu nan a keda contento cu e captura.
E tamaño cu e pisca aki por haya, ta parti di su dificultad pa pisc’e. Su sabor ta haci e especie di snapper aki hopi cotiza. Ora cu bo logra captura un Caraña di bon tamaño, ta definitivamente algo pa bo ‘show off’.
Caraña ta habita rifnan di coral y formacion di baranca na profundidad di 17 pa 76 meter. Nan por crece te cu 1,5 meter largo, y yega na peso di mas di 45 kilo.
Pa rumannan Perez, e Diadomingo ey nan a captura como 6 Picuda tambe. E anochi ey mes nan plan di cena tabata completo cu delicioso cuminda di lama. E potretnan pa cortesia di La Bamba Fishing Aruba.
