Personal di Inmigracion Aruba a sigui curso riba tecnicanan nobo con pa reconoce documentonan falso

ORANJESTAD (AAN):  Inmigracion Aruba (IA), den cuadro di Landspakket Versterking Grenstoezicht,

a haya e oportunidad pa selecta y manda un colega haci e curso di “Documentenherkenning 2” e aña aki.

            E curso aki ta esencial pa por eherce e diferente tareanan diario cu ta resorta bou di encargo di IA. Actualmente mayoria personal di IA ya caba a haci e curso “Documentenherkenning 1”, esta DOC 1.

            E aña aki IA a ricibi e oportunidad pa selecta y manda un miembro di personal Hulanda, pa e por sigui e curso di “Documentenherkenning 2” na Opleidingsinstituut di Koninklijke Marechaussee. Haciendo e curso aki, e persona ta bira un “documentenonderzoeker”.

            Varios trahado a solicita pa e grandioso oportunidad aki. Un comision apunta a haci e evaluacion necesario y na final a scoge colega Anwar Diaz como e persona asigna pa bay haci e curso, cual tabatin un duracion di 3 siman y a tuma luga na Hulanda.

            Durante e 3 simannan aki, colega Diaz a profundisa su mes den e tecnicanan mas nobo relata na documentacion, tambe a trata e formanan con pa reconoce documento falso.

            E curso ta consisti total den 3 parti, pues “Documentenherkenning 1, 2 y 3”. Ora un cursista finalisa tur 3, e ta bira un experto den documentacion, esta un “documentenexpert”.

            Pa IA esaki ta un logro grandi, pasobra colega Diaz ta e prome persona cu tin e curso di “Documentenherkenning 2”. Danki na esaki, e lo bay traha hunto cu e coleganan di Koninklijke Marechausse na “Falsidesk”.

            Director di IA, sr. Andrew Hoo, conhuntamente cu e hefe di operacion di KMAR Aruba, capitan sr. Harro Damstra, a tuma un momento pa felicita colega Anwar Diaz pa su bunita logro y dese’e exito den su trabou diario como un “documentenonderzoeker” na IA.

            Alabes, IA ta contento di por anuncia cu otro aña lo tin oportunidad pa un grupo di personal di IA haci e curso aki. Na e manera aki, IA ta percura pa e personal ta cada dia miho prepara pa e trabou importante cu tur ta eherce diariamente.