Rudy Croes como Ministro y persona tabata defende Aruba semper cu tur su forza

Tributo na un persona nombra antes como Man of the Year di DIARIO

ORANJESTAD (AAN): E tabata luchando pa hopi tempo caba cu un malesa.  Pueblo tabata sa di esey, y tabata keda cu cariño pe.  Specialmente e admiracion cu no obstante e malesa, e ta haci su best pa ta presente na e.o. varios Bike Rides unda e ta un participante activo di basta tempo cu su motorcycle.

   Hyacintho Rudy Croes a nace na Aruba riba 5 di September 1946, y gran parti di su bida a biba na Rooi Taki.

   E tabata traha como Analista di Laboratorio na e compleho di Gezondheidsdienst den Hospitaalstraat na Playa.  Pero semper su interes pa desaroyo estatal di Aruba, y vigilancia di loke politica na Den Haag ta haci, tabata su ‘cuki’.

   Despues cu Betico Croes a fayece, poco-poco a interes a crece den Partido MEP pa duna Rudy un jump-start pa e subi e boto di politica, y a participa den eleccion.  Esaki a yude yega pa bira Ministro di Husticia na aña 2001.  Un Ministro cu a mustra cu e tey pa sirbi pueblo, defende ciudadanonan, y yuda den progreso di e pais.  Su trabao como Ministro a finaliza na 2009, y hunto cu esey el a stop tambe cu su carera politico.

   Pesey mes te cu recien ainda Rudy Croes tabata sostene pueblo di Bonaire cu no a keda contento con e isla tropical a cambia bao maneho di Hulandesnan como un ‘provincia’.  E tabata skirbi constantemente su pensamento al respecto, y semper ta conoci pa ta un persona cu ta duna guia.

   Ademas di esaki, Rudy Croes tabata un persona cu semper tabata pro pa uso di Papiamento den mayoria di su comunicacionnan como Ministro.  El a hasta insisti tambe pa su Departamentonan haya borchi pafo na edificio, cu e nomber poni na Papiamento.  Uno di nan tabata “Openbare Ministerie” cu el a pone nan instala e nomber “Ministerio Publico”.  Kustwacht mester a bira Guardacosta.  Tin mas lugar cu a wordo obliga na usa e palabra na Papiamento.

   Hopi docente local cu ta duna les di Papiamento, tabatin admiracion pa e empuhe constante cu Rudy ta duna pa eleva Papiamento.  Su empeño principal tabata pa pueblo sigui carga e “Papiamento” acepta door di Staten di Aruba desde decada di 1970.

   Rudy Croes tambe tabata e persona cu a presenta e ideologia cu riba Diadomingo ta tur Supermarket mester ta cera.  E ta opina cu hendenan mester di descanso y e dia ey ta uno respeta.  Pasobra toch tin 6 otro dia cu hende por haci compras.

   Pa DIARIO, e tabata haci un trabao admirable riba e tereno aki pa defende su pueblo, purba na inculca e balornan Arubiano den ciudadanonan, y tabata lucha contra barbaridadnan cu politica na Den Haag kier a pusha riba lomba di pueblo.  El a haya e nombramento di Man of the Year di DIARIO pa esey tambe.

  Den mundo social, e tabata forma parti di organizacionnan cu ta tene evento riba caya principalmente pa coredornan di Harley Davidson, y semper e ta participa den “rides”.  E ultimo biaha cu DIARIO a entrevista Rudy, tabata na un momento cu el a reuni cu demas miembronan di Club, na Weng Kee Bar & Restaurant net na cruzada cerca di Santa Cruz y Piedra Plat, unda el a lamenta cu pa di dos biaha ta parce cu lo no por bay organiza e acostumbrado “Betico Day Ride” cu ta ser teni semper riba Dia di Betico cu participacion di coredornan di Curacao y Bonaire.   Esaki a ser cancela debi na e asunto di Pandemia.

   Tambe e tabata haci miles di hende feliz formando parti di Grupo di Betico, y su cancion cu a bira popular cu el a canta, esta “Awa di Tanki Lender”.  Aki e ta canta y toca e wiri na un forma magistral.  Sin lubida e “Mosaico di Rudy” cu tambe a wordo hopi gusta.

   Rudy a demostra cu e ta un persona multifacetico, cu sa con pa aprecia e cultura di e isla, y tambe sa con pa defende tambe!  Esaki ta algun potret di archivo di decada di 2000 cu a sali den corant.

   Di parti di gerencia di DIARIO, famia Mansur y tambe staf y personal, un palabra di condolencia na su esposa, yiunan, demas famia, conocirnan, y su sostenedornan.  Cu Rudy sosega na paz.