Prome vuelo di Frontier Airlines a yega Aruba Diasabra

ORANJESTAD (AAN): Diasabra a yega Aruba e vuelo inaugural di Frontier Airlines.

Den un entrevista cu DIARIO, Jo-Anne Meaux-Arends, Air Service Development Manager di Aruba Airport Authority N.V. a bisa cu di berdad ta un dia special.

“Esaki ta un milestone pa nos y sigur un dia importante, unda cu nos ta yama bon bini na e di 26 aerolinea cu ta bishita Aruba”.

Esaki ta e prome vuelo di Frontier di Miami pa Aruba y esaki ta bay ta e servicio pa cuminza, cu nan ta bay brinda na comunidad.

Tin plannan mas grandi ainda cu Frontier, unda cu e idea ta pa expande e rutanan pa inclui entre otro Orlando y Denver, cu ta yuda conecta nos isla cu e parti west di Merca, segun Meaux-Arends.

El a splica cu segun e ora stipula, e vuelo di Frontier ta sali alrededor di 7’or di mainta for di Miami y ta yega Aruba 11:07.

Segun Meaux-Arends, mescos ta e caso cu diferente otro aerolinea, Frontier ta cuminza cu vuelonan riba Diasabra y despues di evalua con fuerte e destinacion ta, lo sigui expande cu otro punto y coneccionnan mas habri pa Aruba.

E vuelo cu a yega Aruba Diasabra tabata tin 116 pasahero abordo, incluyendo entre otro minister di Turismo Dangui Oduber y CEO di ATA Ronella Croes, kendenan a bay Miami pa topa cu e representantenan di Frontier Airlines y a bolbe Aruba pues Diasabra.