Royal Aruba Aloe a emiti recall pa cierto producto gel di Hand Sanitizer cu nan ta bende online

Relato cu a aparece den prensa Mericano

• Aruba Aloe Hand Sanitizer Gel Alcohol 80%
• Aruba Aloe Alcoholada Gel 

ORANJESTAD (AAN): Den fin di siman, DIARIO a tuma nota con prensa Mericano a re-transmiti un boletin di recall boluntario pa henter Merca, di cierto gel pa desinfecta man, y ta un producto fabrica na Aruba.

   E noticia ta indica cu Aruba Aloe Balm NV a retira boluntariamente for di mercado, un total di 40 lote di e productonan “Aruba Aloe Hand Sanitizer Gel Alcohol 80%” y tambe “Aruba Aloe Alcoholada Gel”, pasobra posiblemente nan ta contene methyl alcohol (conoci como methanol).

   Un ser humano cu haya exposicion substancial di methanol na su curpa, por haya draaimento di cabes, sacamento, dolor di cabes, vision troebel, y otro riesgonan pa salud.  Aunke tur persona cu ta usa e productonan aki na nan mannan ta core riesgo, ta e muchanan chikito cu accidentalmente guli e productonan aki ta core riesgo di mas grandi di venena nan mes cu methanol.

   Te asina leu, Aruba Aloe Balm NV no a ricibi ningun informe oficial di side-effect negativo di uso di e productonan aki.  E productonan aki a wordo bendi solamente online via di e website di Aruba Aloe Balm NV entre 1 di Mei 2021 y 27 di October 2023.

   Aruba Aloe Balm NV a notifica via email tur e clientenan cu a cumpra e productonan aki, y a ofrece un coupon di descuento pa nan siguiente compra.

   Riba e grafico por mira e lotenan afecta pa “Aruba Aloe Hand Sanitizer Gel”.  Tambe por mira e numbernan di lote di “Aruba Aloe Alcoholada Gel”