Rotacion nobo ‘Compagnie in de West’ a cuminza

ORANJESTAD (AAN): Pa medio di un transferensia tradicional , yama ‘peddeloverdracht’ Capitan Tom di ‘Compagnie in de West (CidW), rotacion 39, ta pasa tareanan pa su sucesor Mayor Rian, di Rotacion 40. 

                CidW ta un unidad permanente di Forzanan Militar Real, ubica den Region Caribe. Nan por duna sosten na e tres tareanan mayor di Defensa den Region Caribe.

                E unidad cu ta bayendo ta consisti di Militarnan di Brigada Aeromobil 11 procedente di Schaarsbergen.

                Durante e ultimo lunanan e Compagnie aki a drai den diferente ehercicio, a duna sosten durante e evenemento maritimo Velas Latinoamerica Curaçao y a para stand-by durante pasashi di e tormenta banda di islanan ABC. 

                Capitan Tom p’esei ta mira bek riba un periodo hopi bon. “Un rato pasa mi a transferi e comando di CidW na mi sucesor. Mañan nos ta bolbe bek Hulanda. Mi ta wak bek atras riba 4 luna intensivo, un periodo balioso, durante cua como unidad nos a crece enormemente. Mi kier gradici tur hende pa un cooperacion ameno y ta desea nos sucesornan hopi exito!”

                E Comandante nobo di CidW, Mayor Rian, ta anticipa e 4 lunanan benidero. “Desde awe mi a ricibi e liderato riba CidW-40. Hunto cu un ‘Compagnie’ completamente nobo forma di diferente unidad di ‘Operationeel Ondersteuningscommando Land (OOCL)’ nos ta drenta den e reto bunita aki.  Mi sa sigur cu hunto cu tur nos specialistanan lo por ta di un valor agrega grandi den Region Caribe y mi ta anticipa e colaboracion cu nos coleganan di e Comando di Forsanan Naval.

                Por  ultimo mi ke gradici e staf di CidW-39 pa nan tremendo recepcion na e localidad, y mi ta desea boso un vacacion tremendo.”

                OOCL ta e unidad dentro di Forzanan Militar Real den cua tur sosten operacional a keda trece hunto. Ta trata aki di unidadnan cu un caracter specializa riba tereno amplio.

                Di e forma aki CidW-40 tin capacidad di ingenieria cu ta sigura construccion y mantencion di infrastructuranan completo (military). Pensa aki riba cayanan, brugnan, edificionan, awa, gas, etc.

                Pa esaki e tin un scala extenso di vehiculonan y herment di construccion. Adicionalmente  un unidad di reconocemento tambe ta parti di e rotacion aki. Esaki ta un unidad specialisa den conduci reconocemento den un area di operacionnan militar. Pero tambe nan por keda desplega pa tareanan di vigilancia y siguridad.

                Ambos unidad ta sostene servicionan di emergencia y autoridadnan riba un base regular. Sosten na autoridadnan local tambe ta uno di e tareanan mayo  di Defensa den Region Caribe.

                Durante e simannan benidero, e Compagnie nobo lo prepara su mes pa e rotacion benidero. Nan ta haci esaki organizando actividadnan di ‘team building’ y completando un programa di training interno.