ORANJESTAD (AAN): Na un beach cu ta como 230 km pabao di Aruba, na pueblo Carrizal na municipio di Uribia na departamento di La Guajira, piscadornan a yega tera cu un tribon basta grandi.
E presencia di e animal grandi mesora a hala atencion di masha hopi mucha y demas ciudadano cu a bay mira esaki. Tur a keda asombra pa e grandura di e tribon.
Uniconan cu no a keda contento, ta autoridadnan di departamento di La Guajira, como cu eynan ta estrictamente prohibi pa captura Tribon.
Corpoguajira a bisa cu loke a socede aki ta un atentado contra fauna marina. Captura di esaki a bira prohibi cu Decreto 281 di aña 2021, cu a wordo introduci como un medida pa proteccion y conservacion di Tribon, Manta Ray, y piscanan conoci como Chimaeras (‘draakvissen’).
Hunto cu Ministerio di Medio Ambiente, nan a tene varios Dia di Informacion cu 50 piscado di e.o. Riohacha y Dibulla, pa asina mustra nan pakico ta prohibi captura di Tribon, y splica riba e importancia di Tribon pa salud di oceano. Nan tin un Dia di Informacion planea pa Uribia tambe aki algun dia den Juli. Pero e captura a socede prome cu nan a haya chens di informa piscadonan.
Segun e ley, tin boet di 134 te 50.000 salario minimo, y tambe castigo di prison di 48 luna te cu 108 luna pa esun cu gara Tribon.
E biaha aki, no ta conoci ki destino e Tribon tabatin, y ta presumi cu esnan cu a gare lo a use como cuminda, ya cu e habitantenan di e area a bisa cu na Alta Guajira tin hopi hambresa.
