ORANJESTAD (AAN): E siman aki, fotografo di DIARIO a tuma nota di un ciudadano local coriendo cu un clasico den Oranjestad.
Den un entrevista, cu hopi orguyo e ciudadano Rossy Ras a duna un relato di su bicicleta.
E ta un motorcycle clasico di 1980 y e ta un Yamaha XS2 Twin 650. For di tempo cu Ras a cumpre, nunca mas el a busca otro brommer. “Esaki ta esun cu mi a keda cune,” el a declara den un entrevista cu DIARIO.
Den pasado prome cu el a haya e Yamaha aki, e tabatin un Triumph Motorcycle, pero esey a kibra. Despues di esey el a cumpra e Yamaha, y te awe e tine den su forma original.
Segun Ras, su Yamaha XS2 Twin 650 ta wordo cori constantemente. Claro pa haci trabao di mantenimento, e tin di busca pieza y esey ta dificil pa haya. “Ta na Europa so mi a logra haya pieza pe,” el a indica. Ora cu el a haya sa e adres di e compania na Europa, awor e mes ta busca pieza direct di nan.
E ta admiti sinembargo cu e motorcycle ta exigi hopi mantenimento durante tur e añanan aki. Segun Ras, esey ta un di e puntonan cu e tin di biba cune, pasobra e trabao di mantenimento ta resulta uno costoso
Segun Ras a divulga, e tin un otro brommer mas casi similar, chassis oranje cu preto, pero cu mas bien ta un custom bike. Su Yamaha XS2 Twin 650 si ta uno original.
“Mi mes ta mecanico di e motorcyclenan aki, pues e brommernan aki ta bay ningun caminda for di mi man,” el a indica.
Esey a coste tambe cu e tin su motorcyclenan awe te ainda bon manteni. “Mi mes a traha riba nan y asina mi ta cuida nan lo mihor.”
Na final el a pose pa un potret cu su Yamaha XS2 Twin 650 tambe.
