Rosa Leon ta anuncia varios actividad di Fundacion Movemiento ta Bida pa 60 plussers

Henter October dedica na nos grandinan:

ORANJESTAD (AAN)— E coordinador di e proyecto “Hunto grandi, grandi Hunto”, organiza pa Fundacion Movemiento ta Bida, Rosa Leon, a splica den un entrevista cu DIARIO cu nan ta dedica e Luna di October na e Adulto Mayor.

Fundacion Movemiento ta Bida, conhuntamente cu e proyecto “Hunto grandi, grandi hunto” tin un luna yen di actividad cu ta consisti di charla, car rally, deporte y caminata den naturaleza.

E fundacion a enfoca riba un actividad deportivo “sportinstuif” cu ta bay tin Diasabra awo, den Centro Deportivo Betico Croes, unda lo tin diez diferente wega, unda cu mester traha un grupo di cinco persona 60 plus.

El a pone enfasis cu nan actividadnan ta pa 60 plus, pa locual ta deporte y tambe e charlanan.

Leon a reitera cu pa Diasabra awo mester di diez grupo di cinco hende, unda cu e weganan a keda forma door di IBiSA.

E actividad ta cuminza di 10 or di mainta pa 1 or di atardi, unda e weganan ta pa pasa pret.

Pa dia 23 di October tambe nan tin un Car Rally Edicion 60 plus, unda ta bay den pasado. E preguntanan a wordo traha door di Adoncito Croes y yiu, y nan ta preguntanan cu ta manda bo Noord, San Nicolas y pasa full rond di Aruba, Rosa Leon a menciona.

E dama a agrega cu e meta ta cu nan ta bay cu tecnologia digital, unda ta log in, anto ta haya 20 pregunta di cual cinco ta wordo anuncia door di un radioemisora. E participantenan mester sintoniza e radioemisora pa nan por haya cinco, di e 20 preguntanan.

E regla ta cu esun cu inscribi mester ta un persona 60 plus, y pa protocol ta bay pidi solamente 4 hende den auto, incluyendo esun di 60 plus.

Tur e actividadnan aki ta danki na Setar cu ta e sponsor principal di e fundacion su actividadnan. Pues, durante luna di October tur e actividadnan ta totalmente gratis.

E charlanan ta wordo duna pa, entre otro, notario, Departamento di Impuesto, Setar, dr. Haime, y nan tur lo tuma lugar den e Centro di Bario Playa Pabao. Nan ta cuminza di 9 pa 11 or. E prome charla ta programa pa Dialuna otro siman. Pa mas informacion por subi e facebook page di Fundacion Movemiento ta Bida, unda tin full un calender, y por inscribi.