Ronnie Heyer contento cu su Ford Galaxie 1965

Den un entrevista cu Sr. Ronnie Heyer, propietario di un auto Ford Galaxie 1965, e ta conta cu e ta contento cu su auto.

Ronnie ta conta “E auto aki mes, tabata pertenece na un otro persona prome, kende a staciona e auto den un garashi pa 27 aña largo, cu intencion di cualkier dia cuminsa cu trabounan di restaura e auto bek.  Pero circumstancianan di bida, a pone cu dianan a bira simannan, despues lunanan y finalmente añanan, sin cu e ex doño tabata mira luz na horizonte pa restaura su auto Galaxie. Te cu a yega asina leu, cu e ex doño, a dicidi di puntrami,  si mi lo kier cumpra e auto for di dje y caba cu e trabou di restauracion.”

 Ronnie a bay di acuerdo pa cu e deal y despues di 3 pago, a logra caba di cumpra e auto. E ora e trabounan pa restaura e auto mes a cuminsa, caminda un di e prome pasonan cu a wordo hasi, tabata pa traha un inventario completo di kico tur mester wordo cambia y pa esey, traha un lista di piesa pa order. Despues cu e lista di parts nan nobo tabata den proceso pa ordo, e body a wordo kita completamente for di ariba e chasis, pa asina cambia tur ribber, tubo, cabel cu e originalmente e auto a yega di sali cune for di fabrica. Mientras tanto e trabounan di body work a cuminsa ariba e body pa un bodyman venezolano y finalmente un persona na Simeon Antonio a tira color ariba e body.

  E sientanan a drecha, pa haya e detaye necesario y despues di 1 aña y mei y 20.000 florin gasta, e auto tabata cla pa subi camindanan di Aruba bek. Segun Ronnie, na momento cu e auto a sali caya pa prome biaha, di biaha, el a haya un oferta di un persona cu kier a paga 40.000 florin cash pa e auto, pero el a nenga esaki, ya cu el a tuma e decision, cu e auto lo keda pa su yiu. Un palabra di pabien na Sr Ronnie Heyer cu e bunita proyecto aki y di parti di Diario y Speedworld, ta spera di por mas di e proyectonan aki, subi caya pronto. Aunke mester remarca, cu hopi di nos autonan bon y bunita a wordo cumpra y hiba Corsow y awe ta core rond ta pronkia, enbez di a keda Aruba.