Prome evento “One Happy Dance Tour” a tuma lugar diasabra anochi den cuadro di Congreso di Baile

Anthony Mezas: e meta ta pone Aruba riba mapa internacional den baile

ORANJESTAD (AAN) – Den entrevista cu Anthony Mezas, di “Aruba Dance Studios” a duna DIARIO informacion tocante e evento “One Happy Dance Tour”, cu a tuma lugar Diasabra ultimo, na Renaissance Marketplace.

            Mezas a duna di conoce cu esaki ta e prome anochi  relaciona cu e Congreso cu nan ta organizando pa prome biaha na Aruba, cu tin e meta di pone Aruba riba mapa internacional, den baile.

E Congreso mes lo ta 1-2-3-4 di September proximo, na diferente lugar. Despues lo tin e tayernan di trabao cu lo wordo duna na JFK Education Center, duna pa varios instructor internacional, cu lo bin di Merca, Inglatera, Spaña, Hulanda, entre otro.

            Tambe lo tin un 'pool party' unda varios grupo y scol di baile local como tambe internacional, lo bay duna un demostracion.  Esaki ta un Congreso di Salsa, Bachata y zumba.

            Mezas a subraya cu esaki ta anochinan completamente gratis, dialuna nan lo ta den lobby den e hotel area y lo sigui den otro lugarnan te fin di Augustus. El a reitera cu esaki ta completamente gratis pa haya e support di pueblo di Aruba.