Ronella Croes na Sarah Quita Offringa: ”Sigui briya manera e strea riba nos bandera”

ORANJESTAD (AAN): “Pa mi ta un placer pa dirigi mi mes na tur presente, na un ocasion asina special y historico.

Mi ta hay’e hasta emocional pasobra ami semper ta kere den honra nos hendenan na bida, en bes di honra e famia ora nan mes no t’ey mas”, asina Ronella Croes, CEO di Aruba Tourism Authority a bisa diaranson atardi durante su discurso na ocasion di desvelo di e borchi cu ta indica “Sarah Quita Beach”. Oficina di Turismo a pone fondo disponibel pa e proyecto aki.

            “Cu gran honor e ekipo completo di Aruba Tourism Authority, cu ta traha incansablemente teniendo e helicopter view riba henter nos economia, pa promove un balansa entre turismo, medio ambiente, naturalesa y bienestar general di nos ciudadanonan, awe ta toca nos e placer grandi di honra Sarrah Quita Offringa, ganado di 25 titulo mundial den e deporte di windsurfing, cu un beach dedica na dje”, di acuerdo cu e ehecutivo na cabes di ATA.

            Sarah-Quita Beach ta un ehempel bibo cu memey di nos aki na Aruba, tin talento pa parti. Nos por ta un isla chikto den tamaño, pero nos ta GRANDI den nos ambicionnan, nos logronan y sa cu nos no tin limite den posibilidadnan. Sarah Quita riba su mes ta un fuente di inspiracion pa hopi deportista pero specialmente pa nos hende muhenan. El a demostra curashi, pero tambe disciplina pa logra kibra su mesun recordnan.

            Mas cu tur su logronan for di tempo cu e tabata mucha caba, Sarah Quita a bira un marca eyfo. Mescos cu ora menciona Aruba, tur hende ta pensa riba beachnan blanco den un ambiente tropical, asina ora eyfo menciona Sarah Quita, tur hende ta figura e cabey busha y e beachnan blanco y awa cristalino cu nos so por ofrece. “Y pa esey nos di ATA ta masha gradici y ta sinti nos mes orguyoso di por conta cu un embahador asina pa sigui carga e marca Aruba hiba mas halto ainda”, asina Ronella Croes a bisa cu un bos yena di orguyo.

            Siendo Aruba renombra pa tin e miho beach den Caribe y un di e mihonan na mundo, claro cu por verwacht tambe cu nos hendenan ta haci bon uzo di e bendicion aki cu Dios a brinda nos, esta solo cayente, bon biento y lama calmo. E ingredientenan cu Sarah Quita ta uza pa sobresali na nivel mundial den windsurfing, ta precisamente loke ta haci Aruba special y ta atrae casi 1.5 miyon bishitante tur aña.

            “Y pa nos no lubida di unda nos ta bin y kendenan a contribui pa haci nos isla un marca reconoci mundialmente, awe nos ta celebra apertura oficial di Sarah Quita Beach. Laga e luga aki ta un fuente di inspiracion pa hobennan cu ambicionnan grandi, pa tur cu ta practica e deporte di windsurf y pa cada un ciudadano di e pida baranca aki realisa, cu hopi hende ta inverti sumanan grandi pa bin pasa vakantie y disfruta di e rikesa natural unda nos ta biba. Ban hunto cuid’e, conserv’e y garantisa pa un bon balansa entre desaroyo economico, cuida nos naturalesa, garantisando bienestar general y felicidad di nos hendenan”, asina Ronella Croes a bisa den su discurso.

            E evento a conta cu presencia di varios minister, parlamentario y demas invitadonan. Caranan contento y satisfecho pa e dedicacion special aki na nos hendenan. 

            “Sarah Quita masha pabien y sigui briya, manera e strea riba nos bandera”, asina Ronella Croes a conclui su discurso.