Parlamentario Darlaine Guedez-Erasmus:
ORANJESTAD (AAN): Presidente di e Comision di Famia y Adulto Mayor den Comision Fiho di Parlamento, Parlamentario Darlaine Guedez-Erasmus a anuncia cu e rondanan di reunion cu stakeholders pa loke ta trata e ley di iniciativa pa matrimonio di mesun sexo a finalisa siman pasa.
A haci e rondanan di consulta cu diferente instancia, grupo y organisacionnan den comunidad.
Guedez-Erasmus a laga sa cu a haya informacion hopi valioso den e diferente comisionnan cu a ser poni.
E gruponan a duna hopi informacion relaciona cu e ley di iniciativa pa matrimonio di mesun sexo. Hopi dato nobo a bin dilanti y banda di esaki e parlamentarionan por a haci nan pregunta pa asina por tin mas claridad riba e decision y e pensamento riba e ley aki.
E siman cu ta bin, como comision lo documenta e reunionnan aki cu sosten di griffier di e comision di famia y adulto mayor. "Asina di un manera hopi nechi lo por finalisa e rondanan y entrega un 'verslag' na presidente di parlamento pa asina demostra cu e proceso a bay bon y cu a cana manera cu e mester ta", e parlamentario a indica.
Cu esaki lo duna un bon bista di e magnitud di e ley aki di iniciativa, e impacto cu e lo tin pa comunidad. Pesey lo ta importante pa entrega e documento aki.
Darlaine Guedez-Erasmus como presidente di e comision a enfatisa cu esaki ta un tema dificil y cu pueblo di Aruba no ta cla pa e ley wordo trata. Sinembargo, e ley di iniciativa lo wordo trata dia 8 di mei venidero na un manera democratico.
E ley aki den Aruba su cultura, norma y balornan ta keda un punto di hopi atencion, a remarca.
Finalmente, Parlamentario Guedez-Erasmus kier gradici tur grupo, instancia y organisacion cu tabata presente den e rondanan. Te hasta a ricibi gruponan di Corsou cu a bin Aruba pa duna informacion di nan banda.
Palabranan di danki tambe el a expresa na e miembronan di parlamento cu tabata hopi activo cu pregunta, dunando informacion. Tambe ta gradici presidente di parlamento pa e oportunidad pa trata e reunionnan aki y cu por a finalis'e na un bon manera.
