Agenda di Clima pa Reino tin un importancia directo pa ciudadano
- Kico e exigencia basico di awa y electricidad lo bira pa e Arubiano?
- Sobrevivencia nacional ta exigi adaptacion personal pa awa y coriente
ORANJESTAD (AAN): Na 2024 Aruba, mescos cu henter mundo, sigur ta ricibi e advertencianan cu tin cambio den condicionnan di tempo.
E grado di calor cu a experencia na inicio di 2024, ta papia di un realidad pero tambe a haci necesario pa publico comprende, cu mester cuminsa tene na consideracion cu tur hende, mester adapta nan mes riba tur tereno, na e resultado di cambio di clima.
Clima ta decisivo directamente pa e pakete di gasto cu cada persona tin pa cubri cu su entrada.
Durante lunanan cu ta menos calor, por nota cu hende lo sinti menos urgencia pa bebe awa y ta mas inclina pa keda den aire liber.
Na e momento cu bira mas calor, hende mester aumenta su consumo di awa pero na mes momento, aumenta tambe su higiena personal y ambiental cu calor ta afecta.
Hende mester adapta su paña na e exigencia di clima, cu ta haci realmente cu un persona cu ta traha den un oficina cu air conditioning, mester adapta su mes na e temperatura cu esaki ta trece cune. Na momento e ta den aire liber, e mester tene calor directamente na consideracion.
No mester lubida, cu calor por bira un problema pa personanan cu condicionnan di salud, cu ta afecta e persona na momento cu temperatura subi.
En corto, masy mas experencia ta indica, kico e consumo mensual di awa y coriente ta bira.
Gobierno mester percura pa e prijs di awa y coriente, manera actualmente e ta atende, por wordo carga dor di ciudadanonan, cu na nan turno mester revisa continuamente nan pakete di gastonan pa duna prioridad na e situacion di clima cu ta afecta nan salud.
E gastonan di un persona pues, mester wordo adapta na cambio di clima, cu ta exigi di e nacionnan y di tir su empresanan tambe, pa continuamente revisa nan gastonan, teniendo cuenta tambe cu ainda e temporada mas calor no a bati na porta.
Gobierno Evelyn Wever-Croes a anuncia introduccion di un Agenda di Clima pa Reino, cu sigur ta uno di e logronan di e gobernacion Arubano actual.
E agenda aki, teniendo na consideracion e calidad di bida di e ciudadano cu ta wordo afecta pa condicion di clima, ta sumamente importante.
E nivel di bida na Aruba, por wordo considera excepcional pa un isla chikito, cu no tin fuente natural di entrada, loke ta haci cu Aruba no ta depende di e maneho di Gobierno local solamente, pero tambe di tur desaroyo internacional.
Medidanan cu mester tuma mundialmente pa enfrenta cambio di clima, sigur lo afecta un grupo di prijs di productonan cu mester wordo importa.
Manera ya a bini dilanti, e exigencia pa mas awa y electricidad como producto basico di bida, lo aumenta pero na e haltura cu cada ciudadano ta dicidi.
E balor di awa y coriente den bida di hende, pa e forma cu e ta obtenibel na Aruba, pa un parti demasiado grandi, ainda no ta comprendibel, loke ta e caso tambe na paisnan cu un nivel di bida halto, manera Aruba tambe conoce.
Pa un Pueblo comprende kico ta wordo spera di cada ciudadano, e mester ta na haltura di e plannan di Gobierno cu tambe mester bira ehempel directo ora un persona ta tuma decisionnan den su bida y sigur den e situacion mundial dificil di cambio, pa cual DIARIO a prepara Aruba.
E hecho cu awor un Agenda pa Clima a wordo entrega dor di Prome Ministro Evelyn Wever-Croes na Reino, ta haci cu tin un base mas solido pa den colaboracion cu Reino, sigui dilanti pa enfrenta e realidad nobo di clima.
Gobierno Evelyn Wever-Croes sigur a marca historia den e forma cu e ta comunica cu comunidad directamente y den medionan di comunicacion, loke ta e base mas importante den un maneho democratico, cu exigencia pa ciudadanonan.
Aruba den union nacional y di Reino, a habri un caminda pa cana den loke ya no ta futuro, pero un realidad actual, ya cu cambio di clima a presenta su mes na un mundo, cu mester adapta su mes na naturaleza!
