Meverly Romano, PR di DIMP ta alerta y splica:
ORANJESTAD (AAN) — Relacionista Publico di Departamento di Impuesto, señora Meverly Romano, den entrevista cu DIARIO a relata cu e situacion cu DIMP ta confronta cu ne tur dia, ta cu personanan cu ta cumpra auto segunda mano.
E no a referi na autonan segunda mano cu ta wordo importa na Aruba, sino na e autonan cu ta na Aruba caba y cu ta wordo bendi di un doño pa otro. Romano ta splica cu loke ta wak den practica ta cu personanan cu ta cumpra auto di segunda mano, ta bin DIMP cu nan papelnan y ta mustra cu nan a cumpra e auto, pero DIMP ta bisa nan cu e auto no por wordo registra riba nan nomber pasobra tin debe di belasting riba e auto ey.
Esaki ta crea un problema pasobra e cumprado ta contento cu el adkiri un auto, e kier cumpli cu su registracion, su seguro y tur rekisito, pero e ta haye confronta cu e hecho cu e no por registra e auto pasobra e tin debe riba dje.
“Hopi biaha esaki ta un frustracion pa e doño nobo, y pesey nos kier informa comunidad pa ta alerta ora di cumpra auto segunda mano. Ora di cumpra un auto di segunda mano, claro cu ta importante pa wak e condicion di e auto, pero tambe ta importante pa pidi e papel di belasting di e auto. Laga e doño mustra bo e 'registratie bewijs' pa comproba si verdaderamente, e auto ey ta registra riba e nomber di esun cu ta bendiendo, y di dos, e mester wak tambe e recibo di pago di e belasting. E tin cu wak, por ehemplo, cu por lo menos mitad aña di 2024 ta paga. Esey ta e dos papelnan hopi importante”, Meverly Romano a señala.
E 'registratie bewijs' ta importante, el a splica, pasobra tin hende cu ta bende un auto dos, tres biaha tras di otro, y e auto ta pasa man pa man pero mientras tanto den cada man cu el a pasa, e registracion no a cambia. El a keda na nomber di e prome doño.
Kiermen, ora di bende un auto e registracion mester wordo adapta tambe cerca DIMP. “Esey hopi hende no ta worry pa haci, pero e ta bira un problema ora di bin registra un auto cerca nos, nos ta mira cu e bendedor no ta e persona cu ta doño di e auto, pasobra e ta riba nomber di un otro persona”, Meverly Romano a duna di conoce.
