Rond di mil pashent ta wordo opera di catarata anualmente na ImSan

Dr. Petrochi-Lacle den cuadro di Dia Mundial di Salud Visual:

ORANJESTAD (AAN) – E specialista di wowo Dr. Zuleyma Petrochi-Lacle, manager medico y presidente di e grupo di trabao di specialistanan di wowo na Instituto Medico San Nicolas (ImSan), a relata den un entrevista, cu na Aruba tin hopi reto loke ta concerni tratamento di wowo.

Dr. Petrochi-Lacle a cuminza traha na ImSan na November aña 2012 y a stop durante dos aña y a cuminza bek akinan na 2017, te cu aworaki. 

            Manera ta conoci Diahuebs 13 di October, ta Dia Mundial di Salud Visual, y na Aruba e specialistanan kier percura pa brinda un vision saludable na tur ciudadano.

            “Nos a logra accesibilidad na cuido di wowo na tur pashent, pero aworaki esey ta algo dificil pa nos so cumpli cune, y nos ta purbando di logra esaki hunto cu ayudo di docternan di cas, opticanan, y apart di esey nos ta purbando di bin cu plannan, pa prevencion di e malesanan cu tin na Aruba, y nos kier toch pa nos brinda e cuido cu nos ciudadanonan ta merece”, Specialista Lacle a manifesta.

            El a agrega cu tur cos ta sinta na educacion di pashentnan. Un persona cu ta hiba un bida saludable, cu bon nutricion, haci ehercicio, esey ta yuda na prevencion di hopi malesa, y si e persona ta preveni malesa, ta preveni complicacion tambe, cu, por ehemplo, ta compromete e salud di wowo.

            “Awo mes, no ta wak hopi pashent. Pa dia nos ta wak mas di cien pashent aki tambe, y nos ta operando rond di mil pashent pa aña di catarata, cu ta un volumen hopi halto. Nos ta purba haci nos best pa logra duna e servicio, te unda cu nos por, pero mi ta sigur cu si nos concientiza e pueblo nos por yega na baha e necesidad di operacion”, dr. Zuleyma Petrochi-Lacle a conclui.