ORANJESTAD (AAN): Durante conferencia di prensa di Gobierno di Aruba, Prome Minister Evelyn Wever-Croes a anuncia cu señor Ady Thijsen a huramenta dilanti gobernador como Minister Plenipotenciario na Hulanda diabuebs mainta.
Prome Minister a expresa di tin pleno confianza cu señor Thijsen lo ta di gran aporte pa representa Aruba na Hulanda specialmente na e reunionann di Minister di Conseho di Reino mirando cu e tin hopi experiencia como politico y gran concocemento den tereno di husticia y principalmente di Aruba su constitucion.
Señor Thijsen tambe lo ta encarga hunto cu e directora interino di Arubahuis pa trece cambionan fundamental na Arubahuis na Hulanda. Señor Thijsen lo eherce dos funcion, cu ta e funcion di Minister Plenipotenciario na Den Haag y e funcion di representa Aruba na Union Europeo. Prome Minister tambe a enfatisa riba e hecho cu señor Thijsen lo ricibi solamente un salario pa eherce e dos funcionnan aki, mirando cu tin rumores caba ta circulando cu e lo ricibi dos salario. Esaki sigur no ta e caso ya cu señor Thijsen lo haya e salario di Gevolmachtigde Minister y cu esaki e lo eherce dos trabao. Esaki sigur ta parti di Gabinete Wever-Croes su esfuerso pa contribui na baha gastonan structural den gobernacion.
Prome Minister ta desea señor Ady Thijsen, den nomber di pueblo di Aruba, tur clase di exito cu e reto nobo aki. “Mi tin tur confianza cu señor Thijsen tin e experiencia y conocemento, principalmente e amor pa Aruba, y cu e lo haci un bunita trabao pa nos aya na Hulanda,” Prome Minister a expresa.
