Wever-Croes: "esaki no ta e caminda cu nos kier ta"
ORANJESTAD (AAN): Prome Minister Evelyn-Wever-Croes a indica cu rond di 19 mil (25%) persona na Aruba a haya e 'booster-shot' contra Covid-19.
El a enfatisa cu esaki no ta e caminda cu kier ta. Aruba ta un di e poco paisnan na mundo cu tin e vacuna aki disponibel. "Hopi hende cu nos conoce den otro paisnan no por a haya e booster ainda, pero na Aruba nos tin'e".
Tin un centro cu ta prepara pa acapara vacunacion masal na Santa Cruz. Tin e unidad mobile cu ainda ta na ImSan. Pero ta mira si cu e interes no tey.
Pesey e mandatario a haci un apelacion hopi fuerte na tur ciudadano cu ainda no a busca e booster pa haci un esfuerso. "Ta sumamente importante pa nos percura cu cada nos cada un tin e inmunidad cu nos tin mester pa asina nos por logra cu Aruba por progresa".
"Mas lihe nos ta recupera, mas lihe nos ta bay bek na normalidad. Mas lihe e salario di e empleadonan publico por bay bek na normalidad. Mas lihe nos ta recupera, mas lihe sector priva por brinda mas empleo of mas salario na esnan cu ta traha den sector priva", a enfatisa.
E desaroyo di Aruba ta sumamente importante y esaki ta den man di cada ciudadano y esun cu a tuma su booster caba y esun cu no a tum'e ainda cu por stimula otronan pa tum'e tambe, Wever-Croes a declara.
