Prome Minister a indica: --- ORANJESTAD (AAN): E grado di vacunacion na Aruba ta rond di 75% si ta tene inclui den e grupo esnan di 12 aña bay ariba.
E categoria di 60 plus ta e categoria mihor representa y por bisa cu casi e categoria aki ta yega su target di 85%, asina Premier Wever-Croes a indica diabierna atardi durante e conferencia di prensa tocante e cambio di maneho di Covid-19.
Pa loke ta e categoria di 18 pa 59 aña ta rond di 79%. E categoria di 12 pa 17 aña ta keto bay rond di 60 pa 65 porciento, a bisa.
Pesey e fin di siman tin un vacunathon na Centro Deportivo Betico Croes, di 9 or pa 4 or pa muchanan por bay busca nan vacuna. Mester remarca cu e vacunathon ta pa e prome of di dos vacuna, pero no pa e 'booster', pasobra asina e 'booster' no ta disponibel pa muchanan entre 12 cu 17 aña.
E mandatario a haci un apelacion pa hiba e muchanan vacuna ya cu ta hopi importante pa nan mes ta protegi y tambe pa continuidad di scol y di e lesnan.
Mester haci enfasis riba e hecho cu e vacunathon e biaha aki ta solamente pa e muchanan. E dosis cu nan lo haya ta uno diferente na esun cu e adultonan ta haya. Pesey e dia aki no lo tin dosisnan disponibel pa adultonan, Wever-Croes a splica.
