KRALENDIJK: Tabata Diamars cu famianan di dos piscado a bati alarma, pa bisa cu e boto no a regresa bek Bonaire riba e horario stipula.
E piscadonan aki a subi lama riba Diadomingo pa bay pisca y regresa bek Dialuna merdia. Pero esey no a socede.
Un Helicopter di Guardacosta di Caribe Hulandes a bay bula den awanan teritorial di Bonaire. Nan a bula den varios skina pero no por a haya e boto.
Diaranson mainta, e avion Dash-8 di Guardacosta di Caribe Hulandes a lanta vuelo y a bay sigui busca den henter e area, usando equipo special pa detecta. Porfin den oranan di merdia, nan a logra localiza e boto cu e tripulantenan, den area Noordoost di Bonaire.
Mesora e Helicopter, y tambe un speedboat Metal Shark di Guardacosta di Caribe Hulandes a bay na e area pa check kico ta pasando. A resulta cu e piscadornan a haya problema cu motor, y pesey a keda drief riba lama. Tur dos homber ta den bon estado di salud. E Helicopter a duna nan awa di bebe, y a keda den area te ora cu botonan a yega.
E Piscadornan pues a wordo treci cu nan boto sano y salvo bek pa Bonaire.
