Mientras cu Ling ta lamenta cu el a faya den su trabao
ORANJESTAD (AAN): Despues di a scucha e exigencianan di Fiscal den e caso penal contra ex-Ministro Plenipotenciario Guillfred Besaril y funcionario Glen Ling, Hues a tene un pausa y despues a sigui cu e defensa di e abogadonan. Abogadonan mr. Canwood ta haya cu Besaril no a haci malversacion manera Fiscal ta bisa y ta haya cu mester declara Besaril liber y cu e demanda pa kita propiedad di casi 200 mil florin mester keda rechaza. Abogado mr. Illes ta haya cu Ling no ta culpabel di malversacion. E por a faya den control pero esey no ta hacie culpabel di malversacion.
ABOGADO BESARIL: mr. Canwood a bisa Hues cu Besaril no ta di acuerdo cu punto di bista di Fiscal y ta haya cu e mester wordo declara liber. E abogado ta haya cu den e caso tabata haci preguntanan sugestivo. Na opinion di mr. Canwood, Besaril tabata depende di su personal na Aruba Huis, kendenan mester conseh’e. Centraal Accountant Dienst (CAD) a traha raport di 2010, caminda ta señala gastamento di placanan na Aruba Huis sin aprobacion, pero ningun personal a haci cuenta cu esaki.
*** Na opinion di mr. Canwood, no por papia di malversacion ya cu e facturanan di gastonan a wordo aproba pa Conseho di Minister. Pa loke ta e acusacion di cobrazanan di Setar, e abogado ta haya cu Besaril tin derecho di haya medio di comunicacion. El a remarca cu te dia di awe no tin esaki define o sea con Minister Plenipotenciario ta haya su medio di comunicacionnan pa e haci su trabao. E abogado a mustra cu regularmente Besaril mester a viaha pa Aruba y mester ta na Hulanda tambe. E mester ta constantemente disponibel y acceso di computer pa check mails. Mr. Canwood a señala cu no tin un maneho pa cu medio di comunicacion y tampoco un presupuesto. No por tira esaki awor den scochi di Besaril.
*** Pa cu e cas di huur na Hulanda, e abogado a bisa cu e gastonan di drecha e cas, gastonan di limpieza ta para den ley cu mester haci esaki. Un vez pa siman mester haci limpieza. E 330 Euro cu tabata paga pa luna y awor Fiscal ta coy un suma di tur e añanan. E ta haya cu no por papia di malversacion. Na opinion di mr. Canwood, tur otro Ministernan Plenipotenciario tabata hacie y di con awor ta acusa Besaril pa malversacion. El a sigui bisa cu instalacion di alarma no ta algo no normal. El a splica Hues cu Besaril a duna orden pa check alarma pa e cas di huur. Un empleado di Aruba Huis, G., a scoge oferta pa Besaril y no ta manera Fiscal ta bisa cu ta Besaril a scoge. E empleado L. di Aruba Huis a bisa cu no mester haci peticion na Minister Presidente pa instalacion di alarma. E abogado a sigui bisa cu e compra di muebles pa cas a wordo haci caminda Minister Presidente tabata na altura pero despues Minister Presidente ta bisa cu e no sa di nada. E abogado a bisa Hues cu e muebles a keda atras pa e cas cu ta disponible na Aruba Huis. Pa loke ta e reparacionnan na e cas, e empleado G. di Aruba Huis a bisa cu e ta na altura di e reparacionnan cu mester a haci na e cas y a haci esaki. A busca ofertanan pa drecha e jardin y a haci esaki y a cumpli cu e procedura. Mr. Canwood a cuestiona cu e director Ling, a traha un memo pero no a tuma pasonan pa e personal di Aruba Huis cumpli cu esaki. El a mustra cu Besaril a usa relacionista publico pa informa di su bishita na Roma caminda tin potret di Besaril cu Papa. Tambe a usa e compania pa reuni cu studiantenan cu ta bay Hulanda pa nan estudio y tambe e reunion cu esnan cu a caba nan estudio na Hulanda. Personal di Aruba Huis a haya cu e cobranza di e compania no tabata exagera.
*** Pa loke ta malversacion di placa ora di estadia na Aruba, mr. Canwood a bisa Hues cu promer e viahe tabata priva pero despues a bira un viahe di trabao. Esaki tabata aproba pa Gobierno tambe. Na opinion di e abogado, ta normal cu por haci uso di VIP den avion. El a mustra cu Ministernan Plenipotenciario anterior tabata haci esaki y pakico tin cu colga Besaril. Personal di Aruba Huis a confirma cu Ministernan por viaha 2 vez pa aña cu henter famia pa Aruba y VIP.
*** Na opinion di mr. Canwood, no tin maneho pa usa credit card di Aruba Huis na Hulanda. Besaril a desmenti di no kier duna informacion di reunionnan. Ta personal di Aruba Huis mes a bis’e cu e no ta necesario. Besaril a desmenti di a mal uza credit card di Aruba Huis. Tambe el a desmenti cu a deposita placanan di Aruba Huis riba su cuenta.
E abogado a sigui bisa cu na Aruba, Besaril a usa credit card no pa asuntonan priva sino asuntonan di trabao. E abogado no ta haya cu Besaril a haci mal uso di su funcion. Mr. Canwood a bisa Hues cu mester declara Besaril liber di malversacion y mal uso di su funcion.
Pa loke ta demanda di kita propiedadnan, e abogado ta haya cu mester declara Besaril liber. El a bisa Hues pa tene cuenta cu Besaril a perde tur cos. El a wordo kita for di Polis. E ta pasando momentonan dificil pa haya trabao. E abogado ta haya cu lo ta mas na su lugar un castigo combina caminda loke Besaril tabata sera den prison ta suficiente y un castigo condicional.
DEFENSA LING
Abogado mr. Ills a bisa Hues cu mester declara Ling liber. E abogado ta haya cu Ling no a haya ningun beneficio financiero den henter e caso aki. E pregunta ta bin, pakico Ling a yuda Besaril. Na opinion di mr. Illes, e hecho cu Ling a permiti gastonan, no por bisa cu e ta complice. El a mustra cu Ling a hala atencion di Besaril cu cosnan no tabata bay bon. Ningun momento Ling a yuda Besaril.
*** Cu el a faya como director, Ling ta admiti esey pero esey no ta motibo pa castigo di prison. E abogado a mustra cu e firmamento di facturanan tabata sosode despues cu tur cos a wordo paga caba. Ling no por a haci nada mas. Con por papia di complice, si e pago a wordo haci promer cu Ling a haya factura pa firma. Na opinion di mr. Illes, e situacion lo tabata otro, si pago no a wordo haci y cu Ling mester a aproba promer.
*** El a mustra cu constantemente Ling tabata haya facturanan cu ya a wordo paga caba y no por a haci nada. Ta pesey Ling tabata pone fecha bao di su firma pa laga mira cu e pago a wordo haci caba ora el a haya e factura. E abogado ta haya cu e firma no ta aprobacion di algo cu a keda paga caba. E abogado a bisa Hues cu Ling ta lamenta di no a actua mas tempran.
E abogado ta haya cu no por bisa cu Ling a yuda Besaril y tampoco cu e ta complice. E ta haya cu Fiscal ta duna otro interpretacion di laga sosode, cu malversacion di placa.
E abogado ta haya cu Hues mester declara Ling liber. El a pidi Hues pa desvia completo for di e exigencia di Fiscal. El a mustra cu e caso aki a pone fin na carera di Ling y actual e ta cu pensioen.
LING TA LAMENTA
Ling a bisa Hues cu e ta lamenta cu cos a bay asina leu. Nunca el a pensa cu e ta para dilanti Hues. El a admiti cu el a faya den controla pasobra e no a logra convence Besaril pa stop di haci gastonan. El a bisa cu e no tabatin probecho den esaki.
BESARIL A PIDI DISCULPA
Besaril a bisa Hues cu e caso aki a afect’e duro y su famia. Tambe hendenan cu conoce. El a bisa cu e ta kere den un proceso husto. El a remarca, pakico ta e so ta dilanti Hues y no Minister Presidente y henter e aparato cu el a traha cu ne. El a bisa cu unda hende ta traha por haya fayo. El a pidi disculpa pa loke sosode.
