Rij largo di hende sperando di check descuentonan na La Linda

ORANJESTAD (AAN): E tabata manera algo estilo “Regreso di La Linda”... pero solamente pa dos dia.

   Tanto Diasabra 3 di Juli, y Diadomingo 4 di Juli, tabatin un monton di mercancia obtenible na descuentonan grandi na e edificio principal di La Linda na comienzo di Caya Betico Croes na Playa.

   For di mainta te cu atardi, publico por a bay probecha di algun mercancia reduci te na 50%.

   DIARIO a capta e imagen aki Diasabra mainta, na momento cu tabatin hopi ciudadano para den rij, wardando cu tur pasenshi nan turno pa drenta.  Como cu ta evita aglomeracion paden, cada rato cu un cliente sali, por laga un cliente nobo drenta.

   E rij tabata bay pariba te cu como 40 meter.

   Tur esnan cu ta den rij a percura pa tur cos bay na ordo y a drenta cumpra na cantidad articulonan  na prijs di baca flaco.