Aruba tabata bon representa durante evento exitoso di Taste World Fest na Hulanda

Esaki tabata ‘Caribbean Edition’...

ORANJESTAD (AAN): Den fin di siman pasa a tuma lugar na Rotterdam na Hulanda, e evento di ‘Taste World Fest: Caribbean Edition 2025’.  Esaki tabata den Prinsenpark na Rotterdam.

    Miles di bishitante a disfruta di un mezcla colorido di sabornan Caribense, musica y cultura. E festival di dos dia a demostra atrobe con combersacion, gastronomia y baile por yuda uni hende den Hulanda.

   Taste World Fest tin como meta pa fortalece e cohesion social den comunidad, cu un perspectiva

Caribense. “Ta masha bunita pa mira hende di diferente cultura y etnicidad disfrutando hunto di

cuminda sabroso y musica,” ta loke Gabriël Schobbe a trece dilanti, kende ta relacionista publico di Taste World Fest.

   Mas cu un Festival: Diasabra dia 31 di Mei a concentra riba fiesta y musica, cu presentacionnan di artistanan Caribense y un reintroduccion di Battle of the Drums, cu no a tuma lugar pa hopi aña. E dia a finaliza cu un fiesta di baile den ambiente tropical.

   Diadomingo a pone enfasis riba famia y cultura, cu actividadnan pa mucha, workshop (baila salsa, zouk, bachata entre otro), un mercado mundial y combersacion interesante durante Tasty Talks Arubiano, unda e.o. Victor Wernet y drs. Guiselle Berkel tabata e keynote speakers. E ambiente tabata caracteriza pa union, color y entusiasmo.

   Aruba Presente den Taste World Fest: Un punto sobresaliente tabata e fuerte representacion di empresarionan Arubiano. Negoshinan di Aruba manera Cocktail Chanty, Boca Dushi, Koekjes van Judith, Zimur Service, Chef Menzies, Truck di Tim y Pastechi Saus no solamente a trece nan producto y cumidanan, pero tambe nan historia y pasion.  Aki Gabriël a agrega: “Hopi bishitante a bisa cu nan a sinti manera si nan tabata na vacantie.”

   DIARIO a compronde cu e proximo edicion di Taste World Fest ta BBQ Edition, cu lo tuma lugar dianan 30 y 31 di Augustus 2025. Mas informacoon lo sigui pronto riba Taste World Fest su socials.