PORT-AU-PRINCE: Un total di 184 persona a wordo mata na Haiti, aparentemente debi cu nan a bay haci bruheria
pa busca forma pa e yiu homber di un lider di un Gang por bira malo. Esey segun e organizacion ONG, esta CDP-Haiti a informa.
E masacre a keda registra na Port-au-Prince, exactamente na Warf Jeremie, cu ta un sector di costa di Cité Soleil unda tin un Gang lidera pa Micanor Altes conoci como ‘Wa Mikano’, y cu ta wordo yama tambe Monel Felix. E homber aki ta esun responsabel cu a manda mata cu cuchiu y machete e victimanan. En total 184 Haitiano a perde nan bida.
E organizacion a laga sa via un boletin, cu Wa Mikano a bishita un Houngan (sacerdote voodoo) pa e haya sa pakico su yiu ta malo, y e ultimo aki a bin cu e storia cu debi na algun anciano cu a duna e yiu wowo malo. Esaki a pone fuse di Wa Mikano bula, y el a manda mata tur e hendenan di e area ey den e anochi di Diabierna pa Diasabra. A sali na cla cu e yiu homber di Wa Mikano a muri Diadomingo atardi.
E miembronan di Gang a mata tambe manehadornan di TaxiBrommer cu a trata di huy di e zona cu habitantenan. Hasta un anciano di 76 aña di edad a ser mata Diabierna anochi, y despues nan a kima su curpa. Famia no por a ni dune un entiero, pasobra nan no por a recupera su curpa.
Mientras tanto Gobierno di Haiti a duna nan palabra, cu nan lo actua y bay detene tur miembro di e Gang aki cu a participa den e masacre brutal aki. “E acto di barbarie, di un crueldad insoportabel, a costa bida di mas di cien muher y homber, principalmente ancianonan indefenso,” ta loke vocero di Gobierno a duna di conoce.
Keto bay Gangnan criminal ta controla 80% di Port-au-Prince, y tin e pais bao nan poder, y autoridad ainda ta incapaz pa stop nan atakenan.
