Riba Open Dag di Bloedbank hendenan a haya splicacion riba dunamento di sanger y e importancia di esaki

ORANJESTAD (AAN): Mirando cu awe ta Dia Mundial di Dunado, Diabierna na hospital a celebra esaki,

unda cu esnan cu ta duna sanger a wordo trata na un manera special y a duna un tour y splicacion na Bloedbank na tur esnan cu tabata desea esaki.

            Den un entrevista cu DIARIO, manager na Bloedbank y LABHOH Garreth Tromp a splica cu e dia tabata pa crea mas concientizacion riba e importancia di duna sanger y pa stimula mas hende pa haci esaki.

            El a splica cu actualmente Bloedbank conoce 1314 dunado, pero e mester bira mas pa Aruba por cumpli cu e ‘guidelines’ di World Health Organization (WHO), cu ta conseha pa 3% di un pais ta dunado di sanger. Esey ta nifica cu pa Aruba cumpli cu esaki, mester tin alrededor di 3000 dunado di sanger.

            Tromp a bisa tambe cu Bloedbank ta buscando personanan entre 18 cu 65 aña bon di salud, pa bira dunado.

            “Nos tin un proceso di screening, caminda cu nos ta test entre otro si e persona por tin un malesa, pues nos mes tin un manera pa keur nos dunadornan, pues e boluntarionan mes no mester preocupa cu esey”, segun Tromp.

            DIARIO a puntra Jacqueline Semeleer tambe di Bloedbank cuanto persona cu registra pa bira dunado enberdad ta bira dunado.

            El a splica cu di tur e personanan cu ta meld cu nan lo duna sanger, apenas 2 pa 3% di berdad ta bira dunado.

            Pesey ta importante pa sigui stimula y concientiza hende di e importancia di dunamento di sanger.

Pa loke ta e sanger cu mas tin mester di dje, Tromp a splica cu ora cu a haci uso hopi di tal tipo di sanger, ta haci un peticion na esnan cu e tipo di sanger ey pa bin aden y duna pa por tin suficiente bek.