Advertencia di DIARIO a haya sosten directo den situacion Medio Oriente
* Medio Oriente a aumenta temor existente pa biaha na Merca
*Aumento instantaneo di prijs di petroleo tin resultado preocupante
ORANJESTAD(AAN)—Na momento cu Aruba tabata lesa contenido di DIARIO ayera y tuma nota di miedo creciente di publico Mericano pa biaha, e situacion mundial a conoce aceleracion debi ba e atake di Israel riba e instalacionnan militar y nuclear na Iran.
Informacionnan cu ayera a wordo entrega awor na DIARIO, ta mustra cu e temor cu ya tabata existi a aumenta considerablemente y hasta a bira realidad na Bolsa di Valor, caminda companianan di aviacion y di biahe a sufri caida fuerte.
Diferente compania di aviacion conoci, a mira nan posicion di valor baha na bolsa. Manera informantenan a indica, e incidente ta hiba mundo a atrobe na momento cu peligronan mundial, a reduci e resultadonan di turismo na forma importante.
Awe DIARIO ta entrega prueba di e forma cu e ta vigila interes di Aruba y sigur desaroyonan cu directamente ta afecta e alma economico di Aruba, cu ta turismo.
Pa medio di contactonan directo den e mundo internacional di turismo, DIARIO ta tene su man na pulso di e ramo di economia cu ta ader financiero principal di Aruba.
Turismo ta basa directamente riba e forma cu hende ta inverti den su vacacion, cu mester ta oportunidad pa lubida problema y relaha den un ambiente adecuado pa cual ta gasta placa.
E negoshi di turismo a bira mucho mas fragil, na midi cu turismo a bira un ramo mas accesibel pa personanan cu menos entrada, cu no por permiti nan mes e luho di gasta placa cu ta perdi si nan vacacion no produci e loke nan a desea.
Tambe mester tene na consideracion, cu hopi turista ta reserva adelanta y ta yega na comprimiso comercial cu negoshinan den turismo, pa areglonan special cu ta haci cu nan por perde placa si pa uno of otro motibo nan no por realisa e vacacion cu nan a planea.
Na momento cu ayera a bira conoci cu e confrontacionnan na Medio Oriente a alcansa un fase sumamente serio, alarma grandi a bati pa mundo sigur pa participantenan directo di comercio.
Central den informacionnan economico na Merca ayera, tabata pues e impacto di e desaroyonan na Medio Oriente, cu lo conduci na mas instabilidad pero cu tambe a pone un presion enorme riba e sector internacional di turismo na entre otro Merca, caminda manera DIARIO a splica, ta wordo confronta cu mas peligro macro economico!
Na bolsa di valornan ayera e impacto di e sucesonan na Medio Oriente a wordo confirma sigur tambe cu e informacion cu e prijs di petroleo a subi cu 8.1 porciento pa alcansa e nivel mas halto den cinco luna.
Un impacto sigur cu ta bay wordo sinti riba tur prijs rond mundo, cu mester yega na formulanan special den calculacion di prijsnan, cu a cay y keda te abou pa awor subi manera fli den biento.
Sinembargo, e problema mas serio pa turismo na Merca, a keda e instabilidad mundial cu manera informacionnan di ayera directamente ta confirma lo afecta e mundo di viahe di Merca, cu ta nifica turismo.
Manera a bini dilanti e situacion tin resultado pa companianan di barco pero tambe di aviacion, mientras indirectamente e ta afecta companianan den exterior, manera ta e caso sigur cu Aruba.
Kico e efecto lo ta na Aruba ta sigur un pregunta valido a base di fnformacionnan concreto cu ta indica, con na aeropuertonan na Merca e cantidad di yegadanan registra na aeropuertonan conoci na Merca, a cay na forma significante ya prome cu e incidente.
E sucesonan di ayera a aumenta e preocupacion enorme di informantenan di DIARIO , cu ta mustra cu na Aruba e sector di turismo a conoce ampliacion cu inversionnan cu a wordo haci pa acomodacion di turista pafor di e sector tradicional di turismo.
E necesidad pa mas informacion oficial riba e efectonan mundial riba turismo, a keda confirma atrobe ayera cu informantenan cu ta di opinion cu e situacion mundial ta pone inversionnan haci na Aruba tambe na peligro.
E ramo di turismo mester ta conoci cu loke por afecta entrada di e sector, cu a base di entrada por cubri gasto.
Impacto negativo riba turismo na Aruba ta nifica cu entrada di e pais mes y tur instancia cu ta brinda servicio na turismo mescos cu tur instancia cu ta depende di e entrada for di instancianan cu ta basa riba turismo, lo wordo afecta.
Informantenan ta papia di un circulo vicioso cu lo afecta economia di e pais si no actua cu diligencia.
E situacion mundial ta serio manera informantenan ta indica.
DIARIO ta keda pendiente pa sigui informa Aruba!
