Riba dia internacional di koffie - Recordando e negoshi

E anuncio / invitacion publico pa e Sani Coffee Fest 2023 a evoca hopi memoria di mi participacion den e negoshi di koffie.

Pa hopi aña Aruba tabata e punto principal di unda e koffie di Colombia tabata exporta pa tur skina di mundo, pero alrededor di aña 1975, pa via di un ley cu gobierno a pasa na Colombia, e negoshi di koffie na Aruba a explota manera un bom atomico, y a obliga esnan den e negoshi tuma decisionnan drastico.

Mi ruman Nel Harms kende a traha hopi aña den e ramo aki, a mustra su talentonan como comerciante y a tuma decisionnan completamente “outside-the-box”.

Nel a realiza cue negoshi tabata rekeri comunicacion inmediato, especialmente cu e bolsa di koffie na New York, pero tambe pa otro motibonan cu por afecta e prijs di koffie e dia ey. Aruba no tabatin conexion telefonico directo pa resto di mundo. Hasta pa haci un yamada pa Corsou mester a yama un operadora pa e busca e conexion.  Y despues mester a warda, tin bes oranan largo, pa e operadora por completa e yamada. E solucion di e tempo ey tabata pa uza servicio “telex” cu tambe tabatin su problemanan. 

 Nel Harms tabata sa cu na Boneiro sí nan a haya conexion mundial. Nel a cumpra un cas na Boneiro y a pone un oficina cu telefon.

Pa mas eficiencia Nel a cumpra un avioneta cu por a hib’e y tres’e segun e necesidad surgi. El a cuminsa uza e avion tambe pa e ehecutivonan di Harms Brothers bay Maracaibo for di unda nan por a bay Maicao, e curason di nan negoshi.

Pa transporta e koffie di Aruba pa Miami Nel a uza su propio bapor chikito cu e tabata uza pa transporta cos pa Islas VIrgenes. E bapor aki tabata carga e nomber “Mario E.” pa honra nos tata.

 Pa almacena e koffie na Miami el a huur un warehouse gigantesco den e barrio Hialeah y ami mester a maneha esaki. E warehouse tabatin un entrada especial pa trein drenta y ricibi koffie pa nos clientenan. Na dado momento, nos tabatin casi $6,000,000.00 (si, 6 miyon!) na koffie den e warehouse! 

Den poco tempo nos a realiza cu e bapor Mario E. tabata mucho chikito pa e cantidad di koffie cu nos tabata transporta. A dicidi di cumpra uno mas grandi na Norwega pa hiba koffie Miami y uze pa trece carga di Miami pa Aruba, Corsow y Bonaire.

Pa firma e actonan di compra na Norwega, ami a bay Oslo cu e capitan di Mario E. E capitan a keda encarga pa hiba e bapor Aruba. Mustrando su amor grandi pa su mama, Nel a yama e bapor aki “Catherine F”. Pa maneha e dos bapornan, Nel a crea Arubon Shipping Co. cu oficina den e warehouse na Hialeah.

Pa esnan cu kier lesa mas di e negoshi di koffie, mi ta recomenda e buki di nos periodista/autor Benjamin Romero titula “E NEGOSHI DI KOFFIE NA ARUBA E ruta Colombia-Aruba-Merca”.