Tienda di Educacion:
ORANJESTAD (AAN): Otro siman e muchanan di scol ta bay tin ‘Herfstvakantie’ y mirando esaki Tienda di Educacion ta duna algun bon conseho pa mayornan.
Noeki Haddocks di Tienda pa Educacion den un entrevista cu DIARIO a splica cu apesar di e hecho cu ta bay tin vakantie, lo ta bon pa e mayornan sigui cu e structura, cu ta inclui cu e muchanan tur dia tin un caminda fiho pa bay y pa no laga nan bay drumi demasiado laat, apesar cu nan no tin cu lanta trempan siguiente dia.
“Quizas bo por permiti e muchanan pa bay drumi mey ora of un ora mas laat, pero lage bay drumi por ehempel 2’or of 3’or di marduga, unda quizas e no ta haya suficiente sosiego”, segun Haddocks.
El a bisa tambe cu mester wak bon unda y cu ken e muchanan ta keda ora abo ta na trabao, unda cu quizas e mucha por bay un camping cu hendenan responsabel, pa e por keda participa na actividadnan sano.
Haddocks a bisa tambe cu ta bon pa laga e muchanan haci algun tarea di scol, apesar di e hecho cu nan tin vakantie.
Quizas e mayor por lesa cu e mucha of dune algun som pa e haci, pa ora cu scol cuminza bek nan ta up to date ainda.
Hopi biaha ta pensa cu ora cu e muchanan ta teenagers nan no tin mester di mucho guia mas, pero e mayornan mester sigui pone atencion, pasobra apesar cu nan por keda cas nan so, un bon guia ta importante.
