Revitalizacion di San Nicolas ta pa crea un centro di ciudad yamativo

‘It’s only the beginning’

ORANJESTAD (AAN): Minister di Vivienda, Infrastructura, Servicio Interno y Comunicacion drs. Rene Herde, a anuncia su compromiso di renobacion strategico pa e desaroyo continuo di revitalisacion di San Nicolaas. Cu un bista cla pa crecemento sostenibel y participacion di comunidad, esaki ta marca e inicio di un serie di iniciativa transformativo cu tin como meta pa fortalece e vitalidad economico, social y cultural di e distrito.

   Un prioridad clave ta e creaccion di un centro di ciudad yamativo pa San Nicolas. Door di establece un hub central pa facilita e organizacion di evento y actividadnan cu lo stimula comercio local pa atrae bishitantenan y fortalece un sentido di comunidad. E enfoke aki tambe lo sirbi como modelo pa reactiva Oranjestad.

   Inversionnan significante den infrastructura ya ta den marcha. E renobacion di Kaviti y De Vuyst, hunto cu mehoracion importante den e area di Main Street, ta refleha nos compromiso pa mehora accesibilidad, siguridad y e experiencia urbano en general. E proyectonan aki ta diseña pa eleva tanto e funcionalidad como e atraccion di San Nicolaas como un districto clave pa Aruba.

Den colaboracion cu Minister di Economia, tambe nos lo lansa un masterplan ambicioso pa Baby Beach. Esaki ta inclui desaroyo di kioskonan moderno, mehoracion di e playa, construccion di un pier y instalacion di facilidadnan sanitario publico. Mehoracion similar lo wordo ehecuta na Mangel Halto, pa asina garantisa cu e area di costa ta cumpli cu e standardnan mas halto pa residente y bishitante.

   Preservacion cultural y desaroyo turistico ta keda central den nos esfuersonan. E finalisacion di e proyecto di Carnival Village lo fortalece San Nicolaas como un destino cultural. Ademas, lo otorga permiso pa kiosconan den Carnival Village, creando oportunidad nobo pa empresarionan local.

   Nos ta orguyoso pa anuncia cu construccion di MFA San Nicolaas lo cuminsa e aña aki. E proyecto tan spera aki, cu tabata para for di 2017, ta representa un inversion importante den infrastructura y servicio di comunidad.

   Desaroyo di vivienda tambe ta sigui avansa. Nos ta sigui cu e finalisacion di benta di casnan den Colony, brindando mas oportunidad pa residente inverti den nan futuro. Na mes momento, tin esfuersonan pa modernisa y mehora e area rond di Rodgers y Baby Beach, pa asina mantene nan atractivo y accesibel.

E iniciativa combina aki ta mustra nos compromiso firme cu San Nicolaas. Esaki no ta e fin, esaki ta solamente e comienso. Hunto, nos ta traha pa un futuro mas fuerte y dinamico pa e districto di San Nicolaas y pa Aruba en su totalidad.