Directora di DIMP, señora Luenne Gomez-Pieters:
ORANJESTAD (AAN): Directora di DIMP, Luenne Gomez-Pieters a duna un declaracion tocante e topico actual cu a trece hopi pregunta tanto riba e tereno di impuesto como riba e tereno di siguridad den trafico. Ta trata aki di e e-steps, e-Bikes, e-Choppers entre otro.
Den un entrevista cu DIARIO, señora Gomez-Pieters a remarca DIMP no tin un rol specifico den maneho di siguridad di trafico, sino DIMP tey pa garantisa entrada di impuesto. Tin un comision di trafico cu ta consisti di diferente departamento den Gobierno y representantenan di Ministerio di Husticia y tambe e Minister di Husticia, cerca ken e minister ta tuma conseho.
El a splica cu DIMP ta pa sigui si e procesonan di ley cu nos tin actual. Pa otorga plach’i number na vehiculonan di motor, DIMP ta sigui e proceso di keuring di DTI. Na Aruba nos conoce diferente tipo di vehiculo di motor, entre otro auto, brommer, bus, taxi. Y awo cu a bin e e-steps, e-Bikes, etc, e pregunta a surgi si esakinan tambe mester paga impuesto riba plach’i number.
Señora Gomez-Pieters a splica cla, cu pa registra y otorga plach’i number di auto, e keuring mester sosode prome na DTI. Vehiculonan di motor mester cumpli cu e Landsbesluit voorschriften voertuigen, na unda tin tur indicacionnan di siguridad cu vehiculonan di motor mester tin, entre otro si e tin spiel, brake, luz, seatbelt etc. Momento cu pasa keuring di DTI como un vehiculo cu por ubica su mes riba e careteranan publico, DIMP ta otorga nan plachi di number di auto, sea ta A, MFA, TX etc.
E discusion di e vehiculonan aki menciona, ta ki tipo di vehiculo di motor nan ta y si nan ta cay bou di categoria di vehiculonan di motor. Y si nan no ta cay bou di categoria di vehiculonan di motor, nan no mag di ta riba careteranan publico. Esaki ta e conclusion tambe di e comision cu a duna conseho tambe na Minister di Husticia Arthur Dowers kende a cuminsa cu e accion pa retira e vehiculonan aki for di careteranan publico.
