Revitalisacion di Wilhelminastraat ta un trabao di continuidad y responsabilidad pa futuro generacion

Premier Mike Eman:

ORANJESTAD (AAN): Durante e inicio oficial di proyecto embeyecemento Wilhelminastraat, Prome Minister Mike Eman a pone enfasis riba e importancia di continuidad den desaroyo di centro di Oranjestad y riba e responsabilidad di sigui construi riba e visionnan cu a cuminsa den e añanan anterior. Durante su discurso, Prome Minister Eman a recorda un y tur cu e vision pa revitalisa centro di ciudad a cuminsa cu e buskeda pa conecta Oranjestad miho cu e area di waf, specialmente e zona caminda e turistanan crucero ta yega Aruba.

   Segun Eman, e reto semper tabata pa percura cu e desaroyo di e area di waf no laga e tradicional caya grandi y e resto di centro di ciudad atras. Pa esey, desde e principio a busca forma pa crea e conexionnan entre e diferente parti di Oranjestad, incluyendo e area di Museo Arqueologico Nacional Aruba (MANA), Schelpstraat, Caya Grandi y e zona di waf.

   Den e contexto ey tambe a nace e idea pa uza e tram como conexion pa e turistanan cu ta yega cu crucero por move mas facil pa e centro comercial di Oranjestad. Prome Minister a indica cu Gobierno a inverti hopi den revitalisacion di Caya Grandi y cu e meta semper mester ta pa mantene e area como un luga cu tin oportunidad pa bishitante, cliente, comerciante y inversionista. Un parti central di su discurso tabata e importancia di continuidad.

   Eman a resalta cu e proyectonan grandi manera revitalisacion di un ciudad no por mira den termino di un solo periodo di gobernacion. E vision, segun e, mester carga y continua door di diferente generacion di gobernante y profesional, ora e ta contribui na bienestar y desaroyo di comunidad. Prome Minister a reconoce den e sentido aki e continuidad cu Minister Geoffrey Wever a duna na e proceso di revitalisacion di Oranjestad, incluyendo e conexion entre Caya Grandi, Columbusstraat y Wilhelminastraat.

   El a expresa cu continuidad no ta solamente un asunto di politica, pero tambe un responsabilidad pa cu comunidad y pa cu esnan cu a bini prome. Eman a recorda cu den e mesun caya di centro di Oranjestad a biba y traha e pioneronan economico, politico y e visionarionan cu a contribui na construccion di Aruba y na e idea di un economia cu por crea oportunidad pa tur hende. Pa Prome Minister, revitalisa Wilhelminastraat y centro di Oranjestad, pues, no ta simplemente pone un caya mas bunita. E ta trata di revitalisa oportunidad. E ta trata di crea espacio pa comercio, pa vivienda y pa un centro di ciudad cu por bolbe reuni comunidad.

   Durante su discurso, Eman a indica tambe cu historicamente centro di Oranjestad tabata un luga caminda comercio y vivienda tabata existi hunto. E hendenan no solamente tabata traha den centro, pero tambe tabata biba ey y forma parti di e actividad diario di ciudad. E vision di revitalisacion ta busca pa recupera parti di e dinamica ey y duna centro di Oranjestad  un biaha mas un funcion amplio den bida di comunidad. Prome Minister tambe a destaca e cambio cu ta bira cada biaha mas visibel den centro di ciudad, caminda diferente edificio ta wordo restaura y renoba. El a referi na e edificionan monumental y comercial den y rond di centro, y a reconoce e esfuersonan di e propietarionan, e arquitectonan, e ingenieronan y nos instancianan publico cu ta contribui na restauracion y conservacion di e area.

Durante e ceremonia, Eman a duna reconocemento tambe na e proceso di seleccion di e diseño pa Wilhelminastraat, caminda diferente arkitecto a haya oportunidad pa presenta nan vision. El a felicita Sr. Kamsteeg y su team pa e diseño cu nan a realisa.

   Prome Minister a agradece tambe DOW, Monumentenbureau, Monumentenfonds y e diferente departamento y profesionalnan cu ta contribui na e revitalisacion y restauracion di centro di Oranjestad. E mensahe cu Prome Minister Eman a laga durante e anochi tabata uno di continuidad: transforma centro di Oranjestad ta un proceso cu ta pasa for di un generacion pa otro. Cu e siguiente fase di Wilhelminastraat, e vision ta sigui tuma forma, cu e meta di conserva e historia di Oranjestad mientras cu ta crea espacio pa comercio, vivienda, inversion y bida di comunidad pa futuro.