Minister Geoffrey Wever ta aclarea algun preocupacion:
ORANJESTAD (AAN): Despues di a tuma nota di preocupacionnan di comunidad pa lo cual ta trata desaroyonan di e proyecto pa revitalisa San Nicolas, minister di Finansa, Asunto Economico y Sector Primario, Geoffrey Wever ta haya necesario pa aclarea e puntonan aki pa kita e preocupacionnan aki.
Caminda den B.vd.Veen Zeppenfeldstraat
Por a compronde cu tin un grupo di cuidadano a haya e percepcion cu e caminda den B.vd.Veen Zeppenfeldstraat na altura di oficina di Post Aruba y SETAR lo bira un caya di “eenrichtingsverkeer”, lo cual no ta e caso.
Den e nieuwe situatie tekening por mira cu e caminda lo keda un ruta di dos via (“twee-richting”). Lo amplia e trottoir pa peaton y e caminda lo bira un poco mas smal, manteniendo e via habri pa trafico di tur dos direccion.
Crusada Caya Captain R. Rodger
Tambe a tuma nota cu a vocifera preocupacionnan riba e cambio na e crusada cu ta bay di B.vd.Veen Zeppenfeldstraat pa Caya Captain R. Rodger net pariba di stacion di bus. Desde inicio di e proyecto, hunto cu e arkitecto encarga cu e diseño di e proyecto y DOW, a studia e situacion y a tene debido cuenta cu diferente factor, entre otro e ruta di carnaval cu ta pasa na e crusada aki.
Pa e motibo aki no lo tin trottoir cu lo impedi truck, auto of carosa pa pasa riba e crusada. “Nos a tene debido cuenta cu aspectonan manera fluho di trafico, seguridad y sigur e ruta di carnaval y a mantene e mesun espacio pa por bira y no a pone un trottoir, pero un manera cu truck por subi riba dje sin problema y no perhudica e ruta di carnaval. E ultimo dianan mi tabata tin contacto cu DOW y e arkitecto pa sigura cu e proyecto ta bon ehecuta segun e diseño”, segun Minister Wever.
Minister Wever ta sigura comunidad di San Nicolas cu e cambionan cu ta tumando lugar pa revitalisa San Nicolas, ta cambionan pa mihor y a tene cuenta pa e proyecto aki aporta na un desaroyo positivo di San Nicolas cu lo beneficia tur hende.
